異動空間：當大淡友也轉軚
港股欲彈乏力，H指昨日收市報11137，創7月8日股災以來最低收市價，兩者相距僅30點。當日市場極為恐慌才出現的股災價，想不到陰嚇陰嚇已經落番去，一來反映反彈力度疲弱，二來顯示資金加快撤離中資股，後市向淡。國壽（2628）發半年盈喜，預期純利增長約70%，好
消息即成大戶出貨機會，股價高開後由頭掟到尾。前輩教落，好消息股價冇反應，可以反手造淡，戰友也可利用期權牛刀小試。
國家隊托到手軟的A股，竟獲國際沽空大鱷伸出同情之手？昨日《彭博》有單新聞，提到以前成日唱淡中國民企、著名國際沽空投機者Jon Carnes，突然轉軚唱好中國，原因係A股呢轉升浪太急太勁，唔少人都上唔切車，成大班人滿手現金，在等A股回落掃貨。再者，中國家庭財富去年達21萬億美元，但只有不足10%入市，仍有相當大潛力。魏力認為，阿爺由球證轉埋做球員之後，A股已成私人賭場，自訂規矩玩法，散客仲有冇信心落場？有錢買磚頭好過喇！再講，擅長睇淡的人轉睇好，有多大說服力？不如睇嚇匿名分析3月底唱好神冠（829）後，股價表現係點？
魏力
http://www.facebook.com/2012jason
魏力
異動空間 - 魏力 舊文
