魚樂無窮：尋找亂世爆升股
■佐丹奴中期盈利增長兩成至2.1億元。 資料圖片
人民幣連跌三日，影響陸續浮面。服裝股I.T（999）宣佈，將為數12億人仔定存兌回港元，因此錄得6,000萬滙兌虧損，相當於去年盈利嘅兩成，咪話唔傷。老老實實，大部份上市公司都係賺人仔，做定存諗住財息兼收嘅，
肯定唔止I.T一間。I.T過去三年存款利息收入達1億，還未計滙兌收入，點解今次要急急斬纜呢？一係睇人仔睇得好淡，一係就有其他財技因素，講到呢度，我只諗到2007年因為炒燶澳元accumulator輸鑊甘嘅中信（267）。
身邊戰友也有染指人仔，有北上或香港做定存的，全部諗住班資回朝，蝕息蝕手續費在所不計。玩開A股的，亦陸續沽貨套現，以免賺價蝕滙。試想想，尋常散戶也懂得避開火頭，外資基金怎會按兵不動，一旦全線出手沽貨，A股能否頂得住令人關注。
人民幣概念股炒風暫收斂，取而代之為業績股。佐丹奴（709）中期盈利增兩成至2.1億，扭轉過去兩年倒退局面，主要受惠關閉虧損分店，以及同店銷售重拾升軌，大有turnaround味道。公司財務狀況強勁，自由現金流勁升四成，淨現金超過10億，中期息因而增兩成至12.5仙，股息率逼近七厘。如此有升有息，亂世下可謂絕無僅有，現價較歷史高位平一半，噚日一記大陽燭，相信係復蘇升浪嘅前奏。
唐牛
https://www.facebook.com/tongcow88
唐牛
魚樂無窮 - 唐牛 舊文
