中環在線：
吳宗權「被特訓」怕醜變talk得
■吳宗權噚日好有耐心咁答記者問題。 李潤芳攝
會德豐（020）型仔主席吳宗權，大家都知佢黑黑實實、大大隻，典型陽光大男孩，仲好有禮貌㖭。之不過，唔知佢係咪少同傳媒打交道，見到傳媒通常都表現得幾拘謹，又怕醜，以往主持業績會，現場答問題多數
係一句起、兩句止，想佢講多兩句都難。
噚日中期業績會，大家諗住吳宗權繼續「惜字如金」嘅作風，好難先至撬得開佢把口。
點不知到咗答問環節，無論問美國加息、地產市道，定係人民幣貶值等等，基本上由吳宗權答曬，完全冇走數，佢仲要唔止講一兩句，而係好有耐心咁答問題。
其他在場嘅管理層都好識做，等少爺仔自由發揮，好少出聲。係問到綠城中國（3900）改咗入賬方法，吳宗權先至交畀財務監督李偉中解釋，但佢自己頭尾都有補充幾句。今次突然有呢個改變，睇嚟背後可能係有公關「發功」，幫吳宗權練下點樣面對傳媒，而效果睇嚟都相當唔錯。
吳宗權本身係遊泳健將，仲係「公益金會德豐百萬泳」嘅活動籌委會主席。噚日一講到遊水，佢即刻笑曬口，話一定會盡力支持。
邀請記者遊百萬泳
不過，佢冇透露自己今年會參加幾多項賽事，又唔講邊啲富二、三代朋友仔將會一齊落水遊，反而調轉頭叫記者報名參賽，笑住話「你哋會唔會呀？有公開賽喎。」
佢之前試過同爸爸吳光正「父子兵」上陣，吳宗權就話，爸爸唔知時間就唔就到，但都知道係10月尾舉行。咁大家記得喇，到時就可以睇下一班富二、三代嘅身形，有冇弗到。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
