暗病浮面 唔好搏命
2015年08月21日
港股喺內外夾擊下再度大跌，創出今年低位。表面上個市大插係同美息向上同內地經濟有關，但仲有一個原因，就係中國加入國基會特別提款權觸礁，呢樣嘢搞到人民幣匯價顯著波動，成為兩地股市暗病，依家病況浮面，淡友自然趁機食胡。
IMF唔受人仔玩
據彭博報道，離岸人民幣周三在紐約交易時段高開低走，盤中一度下跌0.4%至6.4651，人民幣在外圍腳軟，相信同國際貨幣基金組織(IMF)周三講到，人民幣至少在一年內不會被加入該組織的特別提款權(SDR)嘅消息有關。
月中內地開始放開人民幣波幅，令人民幣匯價連日向下，內地有個睇法，係阿爺可能聞到味，知道人仔加入國基會特別提款權的機會好微，甚至外資有可能借消息走路，於是先下手為強，讓匯價下調，減低外資在消息公佈後出逃誘因。香港係開放型市場，對呢類消息比內地敏感，所以見到港股近排咁弱。
依家國基會揭埋盅，話特別提款權SDR籃子至明年9月唔郁，市場料人民幣年內加入SDR無望，連有匯金斥資200億元人民幣，增持四大行都頂唔順，上證指數更失守3700點，跌3.4%，挨近低位收市，港股自然弱上加弱，造淡的大戶已經可以食胡。
人仔乏力，再撞正擔心美國9月啟動加息及內地經濟情況，中港股市齊齊跳水。今次仲係香港股市領跌，跟住到A股都頂唔順撻低，結果上證指數挫3.4%，恒生指數連跌五日，跌穿埋7月8日股災低位22836點，收市挫逾400點，創八個月低位收市，恒生指數收報22757點，瀉410點；國企指數收報10402點，跌239點，跌市成交增至超過1000億元，有咁嘅成交，淡友可以從容平倉。
藍籌股近乎全軍覆沒，港交所(388) 再次跌穿200元大關，更失上月股災低位196元，收報195.7元，跌2.35%。中廣核電力(1816) 半年多賺36%，摩根士丹利咁都話中績差過預期，搞到佢收報3.16元，大跌13%，為包尾國企指數成份股。
濠賭股彈完又跌過
濠賭股早排玩反彈，有大行出來唱好，股價又借澳門政府研究放寬吸煙限制炒作，銀河娛樂(027) 主席呂志和在業績記者會估計，6月份的博彩收入已經見底。不過，濠賭股仍然後勁不繼，銀娛沽壓未除，收造29.35元，瀉6.1%；新濠(200) 插7.3%，報12.9元。
澳門博彩業不濟，政府當然想做吓嘢幫手，包括放寬吸煙限制，但這些措施唔能夠解決內地人去澳門博彩下跌的大環境。中央睇法係內地人在澳門輸錢太多，而且涉及好多貪腐問題，必須大力限制，呢個好似金鐘罩咁罩住當地博彩業未來的增長空間，同時令到濠賭股由高估值的增長股，變成低增長甚至盈利倒退的平庸股票。加上幾大賭業股都大力投資起新賭場，生意縮供應增，條數好難圍。
個市咁插法，有中環茶友面都青，話人仔腳軟可大可小，雖然個市調整不少，但有不少股份比低位仍然升唔少，擔心個市仲會再瀉。
從宏觀角度講，好似匯價問題加埋美息向上這類因素，都係基金最關心的大環境，會影響資金大流，中港股市咁跌法，連美股氣氛都有影響；從另一方面講，IMF唔受人仔玩的暗病已經浮面，個市插咗咁多，技術已經超賣，淡友平倉亦已有肉食，隨時出現反彈都唔奇，所以短炒捉路真係要臨場走位，皆因形勢可以轉得好快。但呢啲市仍然記住控制風險，做乜都唔好搏命呀。
陸羽仁
金融High Tea 舊文
