一周三件：中交建有運行
■劉起濤任主席的中交建，食住阿爺谷經濟同一帶一路，繼續有運行。 資料圖片
中交建（1800）今年上半年keep住有唔錯嘅合約簽訂，食住阿爺谷經濟同一帶一路，繼續有運行，要睇睇。
受惠一帶一路國策
中交建主打路橋、港口、鐵路等基建瓣數。去到上年尾，集團手頭未完成
合約8,183億元（人仔．下同），係2014年營收3,660億元兩倍樓上，已穩住陣腳。仲未止，今年以嚟，巴基斯坦通過中交建瓜達爾港國際機場建設項目，總值17億元；哈爾濱市軌道交通3號線二期工程嘅BOT項目，總值265億元；青島前灣自動化碼頭裝卸系統，總值10.4億元，仲有8月頭中標3個道路工程項目，總值22億元。食住祖國透過基建提振政策同一帶一路，中交建繼續密密食。
又之前主打中國機械（1829）講過，阿爺透過基建穩經濟，喺今年5、6月已加快批復各大項目。呢期亦有報道話阿爺會推出超過1萬億元嘅長期專項金融債券計劃，進一步支持基建瓣數，中交建仲唔有運行？
以上周人仔貶值後，場內最新專業評估，中交建今、明兩年EPS1.13同1.24元，現價（9.98元）預測PE得8.8倍同8倍，平過本身歷史平均13.3倍PE近40%。又以中交建營收比重最大嘅路橋瓣數睇，行家山東路橋（深000498）明年預測31倍、成都路橋（深002628）29倍PE、隧道股份（滬600820）28倍PE、新築（深002480）17倍PE，中交建比起最近磅嘅新築，亦係平咗一半。
中交建呢轉跌番落半年起步位兜轉，當上番10倍PE計，講緊要升25%，到12.4元，目標PE未有耐追到行家。
錢雋
細價股專家
本欄逢周一、三、五刊出
錢雋
一周三件 - 錢雋 舊文
