魚樂無窮：冇股炒日子怎過
■港股昨日埋單微跌5點，成交747億，創近5個月低。 李潤芳攝
港股跌過二百升過一百，埋單微跌5點，白忙一趟，成交747億，創近5個月低。一潭死水下，如果要用一首歌形容而家股民心態，我會揀達明一派嘅十個救火的少年。
冇股炒日子特別難過？唐牛並不同意。開市前唔使
忙住睇通告，落街跑下步做下早操，提升健康質素，總好過不停揸住個mouse左鬱右鬱這些局部運動。開市時段，任你將keypad瘋狂按，股價同成交依然零反應，繼續我行我素，不如同屋企人嘆個早茶，享受一下你在冧巴堆中打滾時忽略了嘅天倫之樂。午後冇嘢炒心癢癢？不如小睡片刻，然後3點3食個靚tea，埋單時你會發覺，價錢比胡亂入場平好多。
當然，能夠實踐上述行動嘅人絕無僅有，只適用於炒股過日晨嘅上岸人士。不過，打工仔暫別股壇，埋首工作堆，多一份專心、腦力，少一份緊張、焦慮，自然事半功倍，試問有乜好得過準時收工？
硬係要聽到冧巴先舒服？好，畀隻疑似殼股你研究。高雅光學（907）第二大股東Safilo日前悉售23.05%持股，其後權益披露顯示，陳偉香及蘇啟聲喺高雅光學持股量，由零變成18.54%，每股作價1元，相信就係呢批貨嘅新主人。從賣殼角度出發，第二大股東已走，大股東持貨近五成，市值五億唔夠，加上連續四年蝕錢，萬事俱備，相信好事近了。
唐牛
https://www.facebook.com/tongcow88
唐牛
魚樂無窮 - 唐牛 舊文
