異動空間：亂改賽例最趕客
A股遊戲規則話改就改，沽空不可再即日鮮，轉為T+1交收。內地券商配合聖旨，以改唔切交易系統為由，暫時停止借貨沽空，A股變相走回頭路，去番以前只可單邊買上。莊家係咁改玩法，目的是令越來越少人夠膽落場，場面就易受控，加上只能買升，希望可以谷番起個市。「金融海嘯時，
歐美國家都禁止沽空，A股照跟有乜問題？」如果只係暫禁沽空問題不大，但當大股東唔准減持，救市券商4500點以下又唔准沽貨，規限多不勝數之下，隨時會令A股陷入流動性危機，試想股市有入冇出，你敢落場嗎？大股東被迫增持，即係要硬食虧損，有A股老闆在微博發晦氣，自爆已冇錢掃貨，「以後股票就讓其在大海中自生自滅吧！」試想商人努力將公司搞上市，目的是集資再發圍，點知被綁手綁腳，股市又失去集資功能，自然會意興闌珊。
A股借禁沽空顯著反彈，但3點後港股即時腳軟，反映外資根本唔受呢套中國式救市邏輯，趁大陸頂住個市，基金、莊家自然把握機會出貨。美國科網股弱勢，阿里連跌八日，騰訊（700）難以獨善其身，隨時回落至130蚊水平。
魏力
http://www.facebook.com/2012jason
魏力
異動空間 - 魏力 舊文
