中環在線：打開車門拍卡 忘記拉手掣
曾淵滄遇意外 車門夾傷小腿
散戶至愛嘅投資專欄作家曾淵滄，噚日遇到交通意外入院呀！不過，大家唔使緊張，曾淵滄只係小腿受傷，因而需要入院觀察治理，暫時寫唔到專欄咁解啫，粉絲們不用太掛念，跟開曾淵滄炒股嘅股民暫時忍忍手先喇，反正近日港股風高浪急。
曾
淵滄噚日下午來電，話自己遇上交通意外，華華都嚇一嚇，直至傍晚向佢了解情況，知道情況唔算十分嚴重，先至鬆一口氣。
佢嘅受傷過程其實都幾蝦碌。話說佢噚日早上想駕車出門，出閘時要嘟八達通卡等開閘，但由於架車距離部八達通機，遠咗少少，佢隻手唔夠長拍卡，於是就打開車門，伸咗隻腳落地，將身體哄前去拍卡。
老老實實，好多駕駛人士都遇過類似情況，通常都係咁樣做，之但係，曾淵滄呢次竟然忘記拉手掣，就係因為咁，架車忽然溜前，車門隨即關上，咁就夾親佢隻腳嘞。
留院治理 專欄停一停
好在佢都算身手敏捷，即刻煞停架車，人車都冇大礙。去到醫院，醫生話佢小腿內出血，需要留院治理，成件事就係咁樣嘞。
腳痛入院自然冇心情寫專欄，相信粉絲都會明白嘅，所以曾淵滄嘅專欄要暫停一陣。講開寫專欄，計計埋埋，曾淵滄幫敝報寫財經專欄都有近17年，累積咗好多粉絲，喺財經版嘅收視榜，長期高踞首十名之內，單計投資專欄，佢嘅收視數一數二。
希望曾淵滄早日康復喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
