中環在線：滙豐私銀前一姐
王以智籌款晚會表演
吊威吔跳舞
■王以智喺前晚籌款晚會上吊威吔演出，贏得台下不少掌聲。
滙豐亞洲私人銀行前「一姐」王以智（Monica），2010年底榮休後，偶然都會出現慈善ball或藝術晚會，展露一下舞姿。中大和聲書院前晚喺會展中心舉辦籌款晚宴「九五之尊」
，依人就擔任嘉賓，同拉丁舞老師Lenny Gouwerok拍檔表演「冰雪與火燄」。
Monica出名追求完美，一般拉丁舞已經難佢唔到，今次表演佢仲吊埋威吔，現場嘉賓欣賞後，都無不大讚Monica風采依然。系出名門嘅Monica，父親為已故「船王」王國桐，母親江文琤曾任編劇及導演，姨媽就係聲樂家江樺。
好多人都知佢熱愛拉丁舞，2006年Monica打入稟狀告導師拉丁舞王Mirko Saccani兩公婆，索償已繳學費及利息。庭上爆出Monica以1.2億元天價學拉丁舞，金額之巨令全城譁然。法院最後裁定佢勝訴，追返逾6,000萬元已預繳學費及460萬元利息。官司亦無阻Monica跳舞嘅興趣。
陳南祿彈結他兼打鼓
講番前晚籌款晚會，表演嘉賓都好有份量，除Monica外，仲有恒隆地產董事總經理陳南祿彈結他兼打鼓，同隊band友伴奏「More than I can say」；骨科名醫、前政務司司長陳方安生細佬方津生醫生唱歌劇；平機會主席周一嶽及官場「歌王」兼民政事務局前常秘楊立門都分別獻唱Bee Gees金曲「First of May」及「I Started a Joke」。
籌款晚會都唔係只唱英文歌嘅，「公職王」鄭慕智就夥同周梁淑怡合唱林子祥首「活色生香」，而壓軸表演就由中大校長沈祖堯「祖堯BB」獻唱港人勵志金曲「獅子山下」作結。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
