魚樂無窮：兩隻冇蟹貨靚股
■港股成交只得610億，重返2月底水平。 李潤芳攝
港股靜過鬼，成交只得奀豬610億，重返2月底水平。大家都在等，等甚麼？等議息結果、等五中閉幕、等期指結算，近半個月恒指在23000點反反覆覆，某程度上可以抹走呢段走勢，無他，指標性欠奉也。
炒股不炒市情況
持續，據《上海證券報》報道，中國彩票十三五規劃已完成編制，互聯網彩票發行有望重啟，概念股即時落鑊，最正路揀華彩控股（1371），抑壓咁耐反彈力度肯定超強，係咁易去番250日線（0.57元），都有三成水位。嫌蟹貨太多？今日賣大包，畀夠兩隻破頂股你參考！
第一隻，安踏體育（2020）。作為體育用品股龍頭，走勢先聲奪人，舊年已經升破2010年高位，蟹貨全清，日前宣佈進軍足球市場，與恒大足球學校、江蘇省體育局，及國足主力鄭智等合作，推動青少年足球發展，並且推出相關的專業球鞋。
一句講曬，安踏食正國策及習大大足球夢，憧憬無極限，周二破頂後整固，候回至21元入場，中線睇25元。
第二隻，IMAX中國（1970），半新股一隻，10月初上市，由於公開發售不足額，兼且股價價位大（招股價31元），大家都睇少佢，以為炒唔起，結果一鳴驚人，日日創新高，噚日破旗再上，在貨源歸邊下，炒上50元絕對唔出奇。
唐牛
https://www.facebook.com/tongcow88
唐牛
魚樂無窮 - 唐牛 舊文
