中環在線：夥拍荷李活製片商
嶽少橫琴樂園搞飢餓遊戲？
■林建嶽喺珠海橫琴個創意文化城搵咗好多大牌子合作。 設計圖片
「娛樂大亨」林建嶽（嶽少）鍾意捧大明星，佢搞主題項目亦都要跟大品牌合作。佢旗下豐德麗（571）與麗豐（1125）正於珠海橫琴籌建「創意文化城」項目，噚日宣佈將會夥拍擁
有《飢餓遊戲》系列嘅荷李活電影公司Lionsgate，喺文化城內設室內互動體驗中心。
預計2018年開幕
《飢餓遊戲》係近年大熱嘅年輕科幻電影，嶽少做電影呢行，當然識貨，其實Lionsgate仲有其他電影，包括《非常盜》、《分歧者》，豐德麗與麗豐暫時未有交代呢個室內互動體驗中心玩乜東東，只係話呢個中心面積近24萬平方呎，將有10至15個特色設施，唔知會否設《飢餓遊戲》場景畀人鬥一番嘞。
嶽少亦顧及一家大細，兩間公司同時話，跟持有國家地理學會總特許權嘅iP2 Entertainment合作，喺文化城設一所親子學習體驗中心，面積4.8萬平方呎，設施包括機動遊戲、零售、食肆。
佢哋舊年亦一早話，搵到美國最大電子競技公司Major League Gaming（MLG）合作，將於城內興建全球首個MLG競技場，即係畀人圍埋上網打機比賽，MLG現時有足球類《FIFA》、射擊類《Call of Duty》等遊戲。
嶽少搞呢個文化城，首期投資38億元，聽落真係好令人期待，但公司預計要2018年先至完工，大家仲有排等，到時《飢餓遊戲》仲興唔興呢？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
