反撲
2015/11/03 09:12:47
網誌分類: 經濟
美國昨日出爐的經濟數據唔多靚仔，10月製造業指數從9月份的50.2%下降至50.1%，差過市場預期的51%，增長速度係兩年多以來最低。分類指數中的新訂單指數上漲2.8個百份點至52.9%，但僱傭指數下降2.9百份點至47.6%
，係2009年美國走出經濟衰退之後的最低值，反映美國勞動市場唔係聯儲局官員講得咁好，今個星期五將公佈10月非農就業職位數字，9月非農就業數字嚇死人，如果10月增長唔反彈，又係咁差，聯儲局無藉口喺今年底開始加息。
雖然經濟數據唔得，但市場傳出多單併購消息，多家企業公佈業績，都好過預期，投資氣氛即時生曬，推動大市造好。杜指漲165點，報17829點，漲幅為0.9%；標普500指數升25點，報2104點，漲幅1.2%；納指升13點至報5096點，漲為0.8%。
不過港股的焦點反而在內地打貪和打造市呢場大戲。內地上證綜指昨日低開1.3%，中午收復所有失地，一度倒升0.2%，市場在早一晚已傳出有私募一哥之稱的澤熙公司總經理徐翔被公安拘捕，後來又傳其犯罪同夥被擊斃，央視後來辟謠，被補是真，而擊斃同黨純屬謠言。不過內地午後大市見頂回落，收市跌1.7%至3325點。港股緊跟內地走勢，恆指先揚後挫，全日跌270點，收22370點，跌幅1.2%。
阿爺拉徐翔的原因係呢個私募基金大佬通過非法手段獲取股市內幕消息，從事內幕交易、操縱股票交易價格。據內地報導，徐翔的澤熙投資有十幾次的「精準」投資上市公司的定向增發配股前入市，備受業界注意。資料顯示，從2013年一季度至2014年一季度的15個月內，澤熙投資早於或同時在14家上市公司發佈重組或定向增發公告時買入。其中一個例子係6月下旬，徐翔的母親鄭素貞，動用30億元參與定增，一度驚動咗中國證監會。
另外有消息話徐翔在6月跌前好似收到風那樣，大量減持股票。後來他向人提起，股災之後，阿爺發動基金界入市，佢就拒絕參與救市。
由於徐翔被捕，好多「妖股」原形畢露，紛紛撤資走佬，即時令到大市回落。香港H股也受影響，有些大隻的熱炒股也急回，好似風電股金風(2208)
大跌10.8%，上星期五大炒的「二孩概念股」全線急回，好孩子國際（1086）及蒙牛乳業（2319）急回逾8%。又例如內地國產大飛機C919落地，中航科工(2357)雖然無股份，但旗下子公司供應零件俾C919，都算間接利好，但昨日2357仍跌3.7%，跌到6.11元，都係受大氣氛影響，呢啲股若再跌可以買少少炒?波幅。 市場分析普遍認為今次事件雖然選導致市場動蕩，對中國股市的發展絕對係一件好事。因為反映了阿爺反腐進入高潮，監管股市的政策風向已變。
社科院金融研究所金融市場研究室副主任尹中立更認為，睇番過去大市走勢歷史，2004年市場捉咗了當時有資本市場第一猛莊之稱德隆系，大市由2005年開始2年左右時間從998點直接升上6124點，非常誇張。今年有眾多金融大佬被抓，社保新開46個帳戶，明年養老金要入市，事態發展似曾相識，佢話歷史好大機會重演咁話。
我無睇得咁樂觀，但有個感覺，內地在7月隊低個市係一班人，而家阿爺全力反撲，向呢班人開刀，所以表面睇好似不利大市，但打殘呢班人反而有機會穩定大市。
陸羽仁
回應(1) 我想回應
陸羽仁 BLOG 舊文
