中環在線：汕頭大學演講 怕同胞被洗腦？
超人籲思考要自主
■廣東以色列理工學院昨進行奠基儀式。左起：佩雷斯、胡春華、李嘉誠及郝平。 
噚日內地科技界特別多新聞，除咗國家主席習近平出席烏鎮舉行嘅第二世界互聯網大會，超人李嘉誠亦出
席汕頭舉行嘅廣東以色列理工學院啟動建設儀式，超人喺汕頭大學新體育館就科技創新發表演講，當中提到「天賦和想像力、層次思考、睿智，是無法被指揮或主導」，唔通想講人民嘅腦袋無可能被洗？
此外，超人又引述以色列理工學院創辦人之一嘅愛因斯坦曾經講過，「活出人生，只有兩道，一是認為世上毫無奇蹟，一是相信一切皆可以是奇蹟」，超人話87歲嘅自己能深深體會呢番說話嘅滋味，佢話為咗締造有希望嘅未來，自己係永遠唔會停下腳步。
指汕大「溶鑄了我的心」
講返間廣東以色列理工學院，話說李嘉誠嘅「第三個兒子」李嘉誠基金會，過去一直協助汕頭大學發展，喺2013年9月，超人同基金會推動下，最終促成以色列理工學院同汕頭大學合作創建廣東以色列理工學院，到今年教育部正式批准籌設廣東以色列理工學院，仲獲得兩級政府撥款同撥出土地。噚日嘅啟動禮，廣東省省委書記胡春華、以色列前總統佩雷斯、廣東省省長朱小丹，同埋中國教育部副部長郝平亦有出席。
唔講都唔知，原來超人好重視汕大，佢話，「每當我疲憊、心生厭倦的時候，每當我惆悵、滿懷躊躕的時候，我會想起汕頭大學，這裏溶鑄了我的心」。唔知遲啲汕大會唔會成為超人「第四個兒子」呢？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
