短炒要下移入市位
2015年12月09日
強美元效應持續發揮效果，油價成為受害者，隔晚油價又大插近6%。油價插低，三桶油自然難逃一跌，相比油價得益板塊航空股就個別發展，國泰(293) 隨市大插，無得升之餘仲創1年新低，收報13.04元，跌2.3%，真係衰到貼地。早前有大行發表航空股
報告，看好內地航空股，理由係內地遊客無論出外同本地需求都強勁，首選係國航(753) 、然後係東航(670) 。
航空股升補唔番油股跌
內地航空公司有市場保護，相對國泰就無，所以近年承受競爭一直增加，包括內地航空公司威脅，而且佢係勞工成本彈性較低，今年國泰艙務員願意接受4%加幅，已經好體貼，但喺貨運不振下，收入要有相同增幅真係唔容易，加上早前又話佢商務客位要買一送一變相減價，可知貴價客運亦有壓力。須知油價跌完有回升的一天，市場對國泰營運環境比較審慎，所以油價跌佢哋照插。
內地航空股雖然好小小，但好似東航係油價大插下仍只係升0.9%，收報4.24元，最叻國航都係升0.12元，升1.9%，收報6.36元，升幅都唔算太大，反而三桶油全部跌幅超過2%，中海油(883) 仲跌達3.5%，如果產油同用油股都持有，即使一升一跌，但跌幅大升幅少，咁計起條數就蝕底，證明市況向下時，易跌難升，買股風險相對大。依家入市如果長期投資，捱價機會好大，如果短炒除咗做定止蝕，仲要適度下移入市水位。
喺美元下個星期有可能宣佈加息下，港股仲係要消化壞消息。油價大跌更多一個通縮壓力的難題。內地11月進出口繼續「雙跌」，內地出口跌幅較預期大，並連跌五個月，11月跌6.8%，跌幅較10月收窄0.1個百分點。於進口表現有改善，跌幅顯著收窄至8.7%，但已連續13個月下跌。
11月中國外匯儲備按月跌872億美元，跌幅遠比預期大，跌至3.4萬億美元，為2013年2月以來最低位，可能有唔少資金怕人仔加入SDR後會再跌，所以提早走人。影響之下，人民幣昨收市跌至4年新低。受數據不利影響，人民幣開市中間價報6.4078兌1美元，是「8.11」匯改以來次低，其後在岸價進一步下跌，下午一度跌穿6.42兌1美元水平，收報6.4172元，下跌90點子，創2011年底以來最低水平，吹多浸冷鋒。
前日港股人升我跌已經係不良訊號，昨日跟住美股調整，港股低開145點，已是昨日的高位，隨後跌幅擴大，失守兩萬二，午後跌幅一度擴大至438點，低見21765點，尾市跌幅收窄，恒生指數收報21905點，跌298點；國企指數收報9660點，跌137點，成交稍為增加至763億元。
港交所未插 個市未跌夠？
跌市中港交所(388) 股價唔見咗1.3%，報203.6元，咁表現已經算叻。以大市現時成交，以及全球商品市場對英國LME的影響，港交所應該跌穿200元大關。港交所能夠企得穩，主要係市場願意對佢前景以及業務獨特性俾出一個溢價。若然單計目前盈利，港交所唔應該企到呢個價。
昨日就有報道指，港交所周一將整個研究部解散，裁減部份員工，服務港交所22年的部門主管Matthew Harrison都被辭退。以港交所生意唔會執笠，若無必要都唔會出到裁員呢招。雖然有人會話重組架構幾時都有需要，研究部過了時咪唔要囉，毋須大驚小怪，但作為一個獨家兼年賺幾十億元的機構，係呢個時候出招，難免令人關心係咪都聞到小小燶味呢？
有中環茶友話，港交所係好多股民高位坐艇而唔捨得沽貨的股份，因為大家都信佢生意模式，只要死坐必然可見家鄉，故此當港交所都插得好勁時，投資者就真係不計代價沽貨，個市就真係拋售得好勁，依家港交所未去到呢個地步，所以唔可以話反映晒所有壞消息住。
陸羽仁
金融High Tea 舊文
來源 source: http://hdfin.stheadline.com
