金手指：97和08的分別
■97年時任金管局總裁任志剛於銀行借乾港元，打擊借港元賭港幣跌的活動。 資料圖片
「任一招」，年資輕嘅股民未必聽過。1997年，香港因1984年《中英聯合聲明》中，「每年只可賣50公頃土地起樓」呢個托樓市措施及按揭易造，樓價現泡沫。好多人賭樓市爆，銀行頂唔住
，董建華政府就放銀行同債仔一條生路咁將港幣貶值，好多人來港借港元買美元。
為擊倒呢啲借港元賭港幣跌嘅人，當時金管局抽緊港幣供應，喺銀行借乾港元。點借乾？出天價囉！當年，銀行同業拆息有一晚抽升至300厘（HIBOR plus按揭呀）！時任金管局總裁任志剛呢招叫「任一招」。
央行出手打擊炒家
今日重提，因噚日離岸人民幣喺香港銀行同業拆息都抽上13.4厘。理由可以有一百幾廿個，不過我只係信背後有國家央行出手打炒家。大陸嘅嘢好簡單，錢，或者準確啲叫資本，已經摧毀咗，市價未追番。一係就係啲債主要硬食，將債仔破產、清盤，跟住攞佢哋啲資產變賣，賣完都唔夠還，就連債主（即銀行）都要清盤。呢招就係「應該咁做」嗰招，不過要無比政治力量，因為真係會逼到債仔燒炭或觸發銀行擠提潮。
易食啲嘅方案，就係畀貨幣貶值。不過一旦市場覺得你會用呢招，就會人踩人咁沽，而有外幣債嘅公司，本身可能生意賺本地貨幣上能力冇嘢，不過就因貨幣貶值而倒閉。
索羅斯話今年似2008年，不過我覺得似1997年多啲。2008年、1997年，都係資產價格泡沫爆破危害銀行系統，有乜分別？分別係2008年個個都係借美元，最終聯儲局亂印美元救債仔，不過1997年就冇。而最終分別係，美國到今日仲係共和、民主兩黨玩曬。如果1997年1月1日你去印尼街頭問任何路人：「蘇哈圖政權仲可玩幾耐？」佢哋個個都會話：「直到永遠！」你試嚇喺我國做同一實驗？
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
