中環在線：陳智思打沙排慶生
今年51歲 身形依然弗爆
■陳智思（左三）兩個月前同朋友打沙灘排球，身形弗爆。
行政會議成員陳智思噚日51歲牛一，唔講唔知，佢除咗鍾意每日做gym，仲好喜歡打沙灘排球，實行一邊運動，一邊享受陽光與海灘，佢一班沙排好友對佢好好，每年喺佢生日之前嘅假期，一定
約出嚟打沙排，順便同佢慶生。
陳智思跟一班沙排好友會定期去愉景灣沙灘打沙排，兩個月前先至打過一場比賽，當日風和日麗真係值得影番張相留念，睇陳智思嘅身形，可以肯定佢喺健身方面絕對冇偷懶；加埋佢舊年3月做埋「降低食物中鹽和糖委員會」主席，本身已經注意日常飲食嘅佢，飲食更加要少鹽少糖，令佢身形好似再弗咗，腹肌嘅線條好似更加明顯。
佢跟呢班沙排好友前日已經去咗愉景灣打波，可惜周日好大風兼烏雲密佈，佢哋玩得高興過頭就冇影相。
與高永文午餐
至於噚日牛一正日，陳智思就將食晏時間畀咗食物及衞生局局長高永文。哈哈，佢哋唔係撐枱腳傾秘密，而係約埋一班海外專家，一齊食飯討論如何向市民推廣少鹽少糖。陳智思晚上就跟家人食飯慶祝，聞說陳智思本人唔愛甜，生日蛋糕都只係輕嚐。
細心諗一諗，原來陳智思跟「超人」李嘉誠與「小超人」李澤鉅一樣生肖屬龍，佢跟小超人仲係同一年嘅龍㖭呀。下個月就係猴年，根據研易學會會長傅沛基推算，肖龍者喺猴年有「華蓋」呢顆大吉星照住，有貴人相助㗎！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
