投資先機 - 窮小子 2016年1月27日
投資先機：「一戴一露」時代
■整份施政報告只求夾硬開創「一戴一露」時代，而沒有理會香港嘅民生根本問題。圖為特首梁振英。 資料圖片
網友A問我：近排恒指係咁創新低，持貨較多，心理壓力很大，點算好？
我：唔使驚，香港有「一戴一露」，好多發展機會，恒指實會升番上去！
網友A：嚇，你講咩啊？九唔搭八嘅！
可能大家覺得我嘅回應好九唔搭八，但香港政府就係用呢啲方式去回應香港市民多年來嘅訴求。政府近日推出嘅施政報告，提足42次一帶一路，更荒謬嘅政策係用香港納稅人嘅血汗錢去資助更多一帶一路國家嘅學生來港升學，香港本地嘅大專廢青就注定要每個月定期乖乖還政府grant loan。
如今中國經濟開始放緩，自由行熱潮減退，香港總銷貨價值已連跌九個月，香港零售業已漸漸步入嚴寒。但睇番整份施政報告，近年自由行放緩，香港政府沒有推出相關政策以刺激旅客來港消費，亦沒有推出措施幫助香港商舖應付生意額下跌、但仍要無奈接受加租的核心問題。
高官高高在上掌握較多內部消息及數據，佢哋可能會同你講，經濟嘅嘢你識條鐵咩？窮小子沒有見過畢菲特同喬布斯，但知道零售業市道不好將會影響金融、地產、旅遊、酒店、運輸等行業，香港經濟將會變差，樓市股市下挫。其實香港零售業不需要一帶一路，但很需要香港政府多一點扶持。
香港政府只為自己嘅功名利祿而不理會香港嘅民生根本問題，施政報告夾硬開創「一戴一露」時代，香港就無奈地進入自求多福時代。
窮小子
https://www.facebook.com/poorguyfans.hk
本欄逢周三刊出
窮小子
投資先機 - 窮小子 舊文
來源 source: http://hk.apple.nextmedia.com
