財女手筆：福特輸在車身太大
■福特今年底將會同日本市場講sayonara。 資料圖片
美國第二大汽車廠福特八十年代進入日本市場，度過40年都未能貼合日本人的需求，去年全年只賣出4,968部車，經營成本都收唔番，最終今年底要同1.2億人口的日本市場講sayonara。
據日本汽
車銷售協會公佈，去年上半年全國汽車銷售前10名，輕型車佔7名，一句道出福特的失敗之路。日本人開車，未必人人擁有頭文字D飄移技術，但一定有高超泊車技巧！事關日本人買車，首先要有一張「停車證」，代表你已擁有停車位，不論是屋企車庫或租用停車場，有位先有資格買車。日本城市如大阪、東京等，與香港一樣地少人多，泊車有咁貼得咁貼，樓下一個闊5米的車庫，可能要泊兩架車！
福特在日銷售6種車型，大部份是四驅車，車身高又重，相較日本輕型車慳油小巧，未計進口車稅，試問你係日本人會點揀？
福特近年在日本近乎無盈利，進口車市佔率得1.5%，要豪華不夠寶馬及平治，親民不及豐田和本田，完敗！福特今年亦將關閉澳洲廠，亞洲市場難做？非也，福特只不過集中開拓中國市場，去年單在中國已經出售了110萬部車，是日本銷售的220倍，試問你係福特會點揀？
Melody
本欄逢周三刊出
Melody
財女手筆 - Melody 舊文
來源 source: http://hk.apple.nextmedia.com
