金手指：繼續賺夠好走
■銅鑼灣書店股東被綁架，連藍絲都開始驚，指行動「違反基本法」。 資料圖片
上周孫柏文寫嗰篇《各位賺夠好走》得到異常高嘅收視。我感安慰嘅係越來越多香港人知道，我哋喺上世紀40年代大英帝國沒落後，都能維持「域多利價值觀」殖民地身份嘅原因，就係韓戰被聯合國制裁一役後，證
明畀中共最高領導睇，我哋繼續做大英殖民地有佢哋著數，所以係佢哋叫大英唔好走。
點都好，我就話因家陣好多外來及自閹嘅原因，佢哋唔覺我哋咁有用，所以就唔會積極保護「一國兩制」，畀「一國兩制」自然死亡，大家能做嘅就係賺夠好走。點知不到一周，又有確定訊號。
書店事件藍絲都驚
開書店嘅人被綁架，你話綁架返大陸以前都有，不過我只可以話出名、惹火嗰啲以前唔會，畀面「一國兩制」，費事嚇親人。點知，今次聽聞話為習總情史一書所以做嘢（書名叫《中國（春）夢》？），就算有傳媒前輩話：「可能係下面啲刷鞋仔覺得影響造神工程而行事。」都可睇到香港對中共最高領導嘅重要程度。唔好理佢為乜，80年代香港佔大陸GDP多過兩成嘅時候，光大主席幫尖沙嘴夜總會開幕嘅年代，點會㩒唔住啲前線員工喺香港做嘅嘢？
而我作為分析員最鼓舞嘅地方，就係上周我講過，就算「我哋七百萬人齊心，都不能對抗香港地運近耗盡嘅事實」。呢兩日，見好多藍絲例如羅範椒芬，甚至特首自己係咁講「違反基本法」。Sorry，太遲了，你哋點打報告上去都難阻歷史潮湧。不過連啲藍絲都開始驚，開始醒，有趣。
老實講，你1866年喺倫敦街頭，求其捉住一個人要佢估喺150年後世界邊度會最守到「域多利價值觀」，佢都唔會估係地球遠東華人嘅小地方。香港係個奇蹟，更重要係個歷史意外，係時候revert to the historical mean。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
