中環在線：
財金界爸媽 利是錢創富有法
鄧聲興幫孖B買高息股
■鄧聲興（小圖）會用Jay（左）與Annie嘅一半利是錢買高息股。 受訪者提供圖片
恭喜發財，祝各位今年好似猴子一樣咁精靈活潑。𠵱家人人都講精明理財，利是錢就係細路仔嘅主要收入來源，亦由此開始對錢有觀念，究竟幾位平日教人
投資睇大勢嘅財經人，點樣管理仔女嘅利是錢呢？
■趙海珠會幫囝囝Hayden買保險。 趙海珠為囝囝買保險
舊年底做爸爸嘅靚佬股評人鄧聲興，一早諗好點樣管理一對龍鳳胎Jay與Annie嘅利是錢。佢打算幫佢哋儲起一、兩年，累積到一定金額，就撥一半去買基金，雖然基金回報少，但夠穩陣；而另一半就由佢操盤買股票，不過都係買高息股為主，例如家陣有6厘息率嘅置富產業信託（778）。
「前輪後」趙海珠嘅大仔Hayden3歲，細妹將於今年4月出世。珠珠一早儲起阿仔嘅利是錢，幫佢買包含儲蓄、醫療與人壽嘅保險計劃，佢認為，反正點都要買醫療保險，不如就一次過用利是錢買。
■蘇沛豐千金Louise未滿月，暫未有理財計劃。 不過，招銀國際股評人蘇沛豐與星展靚女經濟師盧明俐就未有具體嘅利是錢投資大計嘞。
蘇沛豐嘅小千金Louise上月出世，今年第一次𢭃利是，但由於阿女未滿月，蘇沛豐都冇積極周圍去拜年，阿女主要都係收到長輩幾封利是。佢諗住等多兩年先幫阿女管理利是錢，暫時就撥落自己口袋，幫補佢派利是嘅開支。
■盧明俐（左）遲啲會幫囝囝Matthew開儲蓄戶口。 星展盧明俐嘅寶貝仔Matthew，未夠兩歲，佢想等阿仔4、5歲，先至幫佢開儲蓄戶口，儲起利是錢，到時再教佢儲蓄嘅重要性。阿仔每年大約𢭃幾千蚊利是，𠵱家由佢袋住先，主要用作買奶粉咁話。
其實利是錢點用都好，最緊要都係大家高興啫。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
