一周三件：大新肥仔潛力
■大新金融噚日升咗7%。 資料圖片
大新金融（440）同阿仔大新銀行（2356）之間嘅PB折讓，係2008年金融海嘯以嚟最大，仲未計，大新金融仲有嚟自保險瓣數嘅肥仔潛在增值。
保險業務估值高
大新金融家陣0.64倍PB，比大新銀行0.82倍PB，折讓近22%。2008
年金融海嘯年以嚟，大新金融同大新銀行每年嘅PB折讓，大部份keep喺14%到17%，而2010年時嘅折讓，更加得7%。將對上8年拉平均，大新金融同大新銀行PB折讓，係12%左右。呢期阿媽比阿仔嘅PB折讓，係呢8年嚟最大。
大新上月中發公告，話各自就大新人壽保險業務，同大新銀行人壽保險產品銷售嘅策略方案，進行探討。有大行連隨發報告，話探討雖然只係初步階段，但市場估計，保險業務價值，已經達到10億美元，折約78億港元，而喺中期報告度，呢瓣價值得42億元。
大新系呢瓣業務策略方案係點，去唔去馬，要等進一步公佈，但參考大行所講市價，非常粗略計數：大新金融股價9個月嚟，跌近40%，現價37.95元嘅總市值，得番127億元，單係保險呢瓣市場估值，已經等於集團總市值61%。又以市場估值額外凸章36億元，折合大新金融每股10.7元，連呢板潛在增值計，大新金融NAV上到近70蚊，得0.54倍PB，比本身過去10年平均值，同彭博綜合行家平均0.95倍PB，亦平咗40%過外。
正路計數，呢轉以PB、PB折讓，增值潛力，同消息面睇，大新金融比阿仔大新銀行值博，而噚日大新金融升咗7%，叻過阿仔大新銀行2%升幅。
錢雋
細價股專家
本欄逢周一、三、五刊出
錢雋
一周三件 - 錢雋 舊文
來源 source: http://hk.apple.nextmedia.com
