中環在線：馮孝忠打波贏港隊
乒乓球賽請對手「食西」
■馮孝忠打出幾個「側旋」，以6比5險勝。 陳奕釗攝
恒生銀行（011）執行董事馮孝忠（Andrew）唔止做trade叻，原來打乒乓波都掂，噚日仲打贏港隊代表，成功請對手「食西」㖭！
恒生乒乓球學院慶祝成立15周年，小六就開始打乒乓
波嘅Andrew當然要落場露兩手，跟世界排名11嘅24歲港隊代表黃鎮廷對打。
■黃鎮廷現時係世界排名11。 陳奕釗攝 
■林鄭月娥（左）同恒生一姐張慧敏都有喺場邊打氣。 林鄭做主禮嘉賓
噚日比賽，Andrew帶埋私家拍，一啲都冇怯場，單係開賽前搓波，已經連接對方18板，到真正開波，亦多次使出絕招「反手推擋」請對方「食西」，結果以6比5險勝。
Andrew賽後笑笑口，好謙咁話對手讓佢，自己保住冇失球，先可以贏波。其實Andrew戰績一向彪炳，小學、中學時期已經成日搵同學仔打波，最犀利係讀港大時，有兩年文學院中、英文學系嘅系賽贏過一金一銀。
Andrew話，加入職場後，已經冇乜時間打乒乓波，對上一次係舊年5月，所以噚日都要專登早45分鐘去到會場熱身，順手搵教練操番幾板，好在打波手勢冇生疏，仲打到幾個「側旋」出嚟㖭，估唔到59歲嘅Andrew寶刀未老。
唔講唔知，恒生與香港乒乓總會合作25年，2001年成立乒乓球學院，培訓出唔少港隊精英，就連政務司司長林鄭月娥兩個仔都曾經係佢哋學員。
所以林鄭噚日都專登出席做主禮嘉賓，佢話就算幾忙都要到場支持，事關自己都係受惠家長，雖然兩個仔學藝未精，但係透過打波，學識何謂團隊精神，一定要飲水思源咁話。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
