智取大市：非常劇本失控結局
■中證監主席劉士余希望大家「都要買股票，不要賣股票」。 資料圖片
美國QE、四萬億，去到舊年大時代、暴力救市、走資、內房急升，根本係一齣連續劇。噚日解釋咗內地樓市點解發狂上升，就係因為鎖國令資本塞死喺內地，樓市有入冇出，最諷刺係，啱啱出席人大小組會議嘅新任
中證監主席劉士余，希望大家「都要買股票，不要賣股票」，實際國情竟然係「都買大陸樓，不賣大陸樓」。連首付貸近排都叫停，可能阻止過度槓桿而直接重創金融體系嘅機會，即使內地一線樓市爆煲，樓按風險唔嚴重，的確未必直接將風險傳導去銀行。
如果面對刻下樓市問題嘅，係一個強健嘅金融體系，的確問題不大，不過，對於金融體系百病叢生嘅中國嚟講，就算冇樓按安全性嘅風險，他朝都會因為樓價急轉直下，而令物業作為抵押品嘅功能失效，同樣可以令資金快速緊縮，一樣可以好大件事，不能睇小。
中國嘅金融市場由暴力救市開始，直至現在樓市癲升、信貸激增、外資逃走，一系列非常情況接踵發生，而中共領導人同金融官員，似乎對於目前境況，只懂得眼巴巴睇住所有事情發生，然後用禁沽令、外滙管制呢啲中學生都諗到嘅手法去堵塞股災、走資漏洞，跟住嚇嚇冇後著。
非常局面只會非常落去，但肯定係越來越失控，最險一幕，照計未出現，反彈過後嘅中資股，要避一避。
晉佳
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.apple.nextmedia.com
