女神tea time：電動車有政策扶持
■近年香港越來越多Tesla喺條街度行。 資料圖片
近年香港越來越多Tesla喺條街度行，無他，型得嚟性能又唔錯，免稅後個價又唔太貴，更重要係，行出街收視率高！香港電動車擴大，內地就更加係。不過最大問題係，充電樁的確唔夠。內地不
斷推充電樁行業利好政策，令行業上年開始提升。以深圳為例，半年幾時間，慢速充電樁就由去年5月底的近3,000個，增至年底超過1.5萬個！
有政策扶持就要識揀一隻股去攻！是日推介泰坦能源（2188），冇錯佢之前發盈警，料上年全年蝕錢。不過隻股2014年已經蝕緊4,383萬元人仔，但2015年上半年都係蝕188萬元計，全年照計唔會蝕太多。另外，盈警又提到，蝕錢主要由於投資電動車充電設備業務多咗，但同時銷售真係大幅增長！所以證明佢轉型漸入佳境。
公司上月底公佈，深圳大孖沙大洋電機落實買入1億元可換股債券，每股兌換價亦同為1.19港元，同上年入股泰坦個價一樣。一旦全兌，大洋電機成為第二大股東，持股增至16.66%。大家要知大洋電機係廣東省中山市電機供應商，兩者組合營喺中山市拓充電設施業務；加上其中標成國家電網部份充電項目供應商候選人。近日股價見底回升後整固，不失為收集良機。
Fifi
http://www.facebook.com/lovefrystock
本欄逢周四刊出
Fifi
女神tea time - Fifi 舊文
來源 source: http://hk.apple.nextmedia.com
