一周三件：和諧勢被湊大
■和諧汽車同阿里巴巴旗下阿里汽車，訂立框架協議。 路透社
和諧新能源汽車（3836）食住新能源汽車熱潮，搞高端智能電動車瓣數，拍住嘅，全部係市值至少2,000億元嘅全球頂尖級大孖沙，已經可以將和諧湊到肥肥白白！
和諧上年改名，打正旗號搞新能源汽車瓣數。集團先後
同熱銷嘅Tesla電動汽車，推售後業務合作，又2014年尾宣佈配股，引資台灣鴻海（台：2317）。家陣鴻海揸和諧超過8%，係和諧第二大股東。到上年，和諧主打高速電動車嘅「綠野汽車」，再引入包括鴻海，另騰訊（700）旗下企業，實行大搞。
合作夥伴大有來頭
牌頭未曬完。相若時間，和諧同阿里巴巴（美：BABA）旗下阿里汽車，訂立框架協議，喺互聯網同汽車銷售、服務方面，展開全面戰略合作。
和諧家陣市值73億元，上邊合作方對口，騰訊同阿里巴巴，市值1.5萬億港元、Tesla市值近2,600億港元，而第二大股東鴻值3,070億港元，亦講緊係和諧市值嘅42倍！場內分析，鴻海smell到內地新能源車市場，商機勁厚，低調佈局。諗到亦睇到，和諧拍住咁多大孖沙，贏在起跑線，加埋鴻海實力，憧憬和諧被湊大，有幾奇？
場內專業評估，和諧今年得7.8倍預測PE，比龍頭比亞迪（1211）28倍PE，足足平咗72%！又和諧上年中配股，配股權益佔已擴大股本近17%，唔嘢少，當時配股價8.18元，和諧現價4.65元，又平咗43%。買和諧，當上番呢個配股價，講緊要升76%，到時，預測14倍PE，呢個瓣數中，和諧PE仲係好平！
錢雋
細價股專家
本欄逢周一、三、五刊出
錢雋
一周三件 - 錢雋 舊文
來源 source: http://hk.apple.nextmedia.com
