中環在線：財金版《矛盾》
小加、華峰絕配
■李小加與張華峰係金融界嘅歡喜冤家，應該有好多「矛盾」，但周松崗話自己冇同人有矛盾喎。
電盈（008）旗下免費電視ViuTV套《跟住矛盾去旅行》近期hit爆，頭炮搵來立法會主席曾鈺成同長毛梁國雄一齊去波蘭，睇到唔少人笑到反肚。如果嚟個財經界
版本，證監會跟港交所（388）一向唔咬弦，好似之前點都唔畀阿里巴巴來上市。唔知港交所主席周松崗有冇興趣，同證監會主席唐家成，或者更辣嘅行政總裁歐達禮一齊去旅行呢？
周松崗：冇同人有矛盾
周松崗噚日同傳媒食晏時被人咁樣一問，即刻以一貫四萬笑容接招，話：「我冇同人有矛盾喎。」唔係啩？如果一定要揀個人上路呢？「我太太啦。」呢句真係可圈可點，究竟想呻同周夫人暗啞底矛盾大到要去旅行，還是反過來話自己係愛妻號呢？見主席成日笑咪咪，應該係後者喇，學英諺話齋，「Happy wife, happy life」嘛。
其實講到金融界嘅歡喜冤家，肯定係港交所行政總裁李小加，同肥老闆、立法會議員（金融服務界）張華峰。咁佢兩位去旅行，又有冇睇頭呢？周松崗可能費事出賣戰友，聽到只係笑而不語。
華華問過肥老闆，佢好豪氣咁話「佢（小加）驚俾我質呀！」不過轉頭佢就話要公道啲講，小加頭腦好靈活、幫業界諗好多計仔，推好多新產品；又明白小加係性情中人，諗到乜就講。
肥老闆又寄語呢位小加總裁，「你係做到好多嘢，但係一個人拍手掌冇用㗎，大家一齊拍手掌先好吖嘛」。呢一招係咪一啖砂糖一啖屎呢？電視台快啲約佢兩位去旅行喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
