腳快快中地雷
2016年04月13日
呢排市況變動不大，恒生指數收市升63點，收報20504點，國企指數收報8841點，升34點，成交只有519億元。喺呢啲悶市，有啲投資者轉向炒作概念，但有時反應太快都會損手。
先前中國金控(875) 公佈向珠海德谷
基金管理及深圳市前海阿里基金管理發行可換股債券，最多籌24億元。
中國金控誤會唔美麗
大家聽到「阿里」兩個字，惹來對阿里巴巴的憧憬，中國金控周一復牌飆升近倍。點知跟住被揭破前海阿里與阿里巴巴無任何關係，可換股債券亦未必能獲港交所(388) 准許，腳快快搶入的股民，即刻中地雷。
中國金控昨早急升後掉頭急跌，股價一度喪升51%，之後掉頭插落嚟，收報0.222元，跌8%，咁嘅誤會認真唔美麗。炒呢類變身股，好多時大戶在黑、散戶在光，好容易就中招。
炒股仔朝富晚窮，好多穩陣派寧願買藍籌，特別係公用股。中電(002) 呢幾日透露，會研究在大嶼山以南的索罟群島對開海面，興建全港首個海上液化天然氣接收站，建成後可藉運輸船從世界各地輸入液化天然氣，理由係咁做可以增加氣源、提高向內地購買天然氣時的議價能力，有助降低燃料成本。項目將於短期內展開環評，至於成本和預計效益暫時就未有披露。
中電呢招相信亦係為一輪專利談判鋪路，因為佢嘅專利即將屆滿，環境局局長黃錦星講明要降低回報，副局長陸恭蕙仲搶晒韁，話要由家接近9.9%減到6%，若然真係咁中電真係死得，就算中間落墨，管理層都要諗辦法增加投資，谷大番資產去保持利潤。
去年中電發電燃料組合中，天然氣約佔25%，未來增用天然氣，本來構想主要是透過「西氣東輸」向中石油(857) 購入，以及來自中海油(883) 的海底新天然氣田。中電以前曾經提出，香港自己起液化天然氣站，最後被政府打謝。呢次佢建議捲土重來，若然成功的話，投資額會有番咁上下，提高佢資產投資，幫補佢喺未來回報率可能下調帶來嘅影響。
中電呢排表現叻仔
中電為咗滿足政府的環保要求，大幅增加使用天然氣，燃料費用急升，本來要大幅加價，政治壓力唔細，好彩咁啱撞正能源價格大跌，紓緩咗加價幅度，仲令佢儲埋大筆燃料儲備，作為日後油氣價格回升的緩衝。
雖然電價近年保持平穩，如果油氣價格由低位回升，加上有重大資本投資上馬，電價就要急上，政治壓力唔易頂，呢個亦係政府最大關注。現在公司趁社會對電費的關注唔係咁大，乘勢提出增加投資，係好聰明做法，能唔能夠成功，要靠管理層游說策略同功力嘞。
睇番佢股價過去兩年相當靚仔，喺大圍市唔係咁好下能夠陰陰升，仲跑贏埋同樣係做能源的煤氣(0004) ?。
家市面氣氛麻麻，若然公司前景唔能夠俾人信心，股價跌起上嚟都幾得人驚。好似隻味千拉麵(538) ，自從上個月公佈業績少賺咗，股價反覆走下，唔覺唔覺都插近一成，由於佢之前已經跌咗唔少，累計跌幅都幾可怕。
味千早前公佈2015年底止業績，盈利雖然跌咗18%，純利仲有2.27億元，股價在盈利倒退下持續「發軟蹄」，一直都企唔穩，呢個星期再創幾年低位，昨日收報2.76元，彈番2仙。
味千主席潘蔚透露，去年收入及純利下跌，與內地商場增加餐飲比例及商場數目增多，餐飲市場出現飽和令競爭加大，佢坦言對今年市況不看好。今年公司將計劃於上海及北京增設10間外賣專門店，同時保守估計開設80間新店，加上其他翻新開支等，預料今年資本開支約1.8億元人民幣，與去年相若。
味千希望能夠透過增加投資保持競爭力，但有大行就擔心公司出現品牌老化現象。美銀美林之前已發表報告，看淡公司前景，後來業績買細開細，唔係咁靚仔，股價一直下插。
現時味千市盈率13倍多啲，但息率超過6厘，可惜息率咁高主要係因為股價跌得多，先至推高咗。佢三年間高位去過接近9元，累積跌咗差不多67%。今年展開新一輪跌幅，由於內地消費唔係咁好，加上內地人對味千印象同幾年前大有分別，令人擔人黃金歲月一去不返！
陸羽仁
金融High Tea 舊文
來源 source: http://hdfin.stheadline.com
