智取大市：越恐懼越有胃口
炒股票，消息或估值不是重點，消息配合估值先至係重點。即使壞消息夠多，但最重要係，估值足夠反映壞消息未。近期經典例子莫過於霸王（1338），佢同壹傳媒（282）單官司表面係贏，實際係輸，判詞嘅星期一先升18%再倒插6%收市，震走成班炒官司嘅友仔後，星期二、三爆
大冷，兩日升夠六成。壞消息都炒得起，吹咩！起步位市值得11億元，殘到冇朋友，貨源又夠乾，話升就升，任佢點舞都得。
另一經典例子係港股，藍籌市賬率1倍鬆啲，破產價下，除非真爆煲真破產，否則要大跌不易，成交又係乾，大戶可以舞龍咁舞。
呢兩日港股即市回吐一陣就有人撈貨。收市後，夜期開市又嚇嚇一開就升，呢啲都係市底轉強訊號。唔敢講中途點震倉法，但呢一輪升勢，斷估幾周內可突破4月28日高位21654點，有千幾點升幅或更多都唔奇。只要市場繼續審慎，震倉機會就越低，越恐懼就越好。
讀者們有睇開都知，小弟近期心頭仔係科網或手機概念股，點解？港股成交始終低，有限錢第一時間只搵好股買，龍尾股有排都未受惠。買強勢板塊可確保升市有資金流入，升多升少點都有得執嚇。
晉佳
http://www.facebook.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com
