港交所要捱
2016年05月26日
港股昨日大升537點，夾淡倉意味相當濃，香港升2.7%，內地股市跌0.2%，唔係太正常。夾得咁應，係因為幾種因素，外圍配合，港股成交跌到今年低位反映沽壓唔大，仲有就係《華爾街日報》之前爆料，話阿爺寧願走回頭路，都要攞番匯率主導權放慢匯改。
《華
爾街日報》披露國家主席習近平喺匯改後見到資金大量流失，感到非常震驚，決定叫停匯改，唔再任由匯價由市場主導。中央喺今年初控制住匯價的現象，係市場有眼都睇得見嘅事實，有人將習主席轉向呢個國家機密話畀《華爾街日街》聽，我覺得有幾個作用，一個係出口轉內銷，借外面嘅聲音話畀自己友聽家最新嘅形勢，確定最高層嘅政策方向；再者，就係向市場放話，大家唔使賭我會放手畀人民幣任插嘞。
阿爺加料夾倉仲應
人仔匯價波動，係農曆年港股插穿萬九點的導火線，跟住阿爺拉閘放狗，夾高離岸價同息口，掀起一輪平倉潮。之後索羅斯同巴斯幾個大炒家出口術，話瞓身沽空中國資產，但效果有限。呢次《華爾街》再爆響口，可以視為下集，按照阿爺口徑，佢寧願人民幣唔走出去，都要攞番匯價話事權，即係話貶唔貶值唔係跟市場，大鱷愈係市場沽空，佢就愈唔肯貶，由於人仔在海外的資金池已經大幅收縮，要沽空成本好貴，同樣情況沽空港股都係一樣，所以如果陸羽仁係大鱷，睇完報道都會諗吓係咪應該撐落去，所以唔排除港股彈得咁勁，都係同平倉有關。
雖然話阿爺閂閘可能短期夾高個市，但規模幾大仲要觀察，因為睇番人仔匯價回穩已經有個幾兩個月，估計有部份對沖基金已經一早平倉，所以人仔最近亦隨美元反彈而回軟。至於股市彈得幾多，要睇仲有幾多淡倉要平，當個市上得咁上下而成交回落，好可能就係夾倉潮尾聲，有可能來得快去得快。
呢次夾倉咁應，多少因為隔夜美股爆升逾兩百點，創兩個月以來最大升幅，所以恒生指數大升537點，以貼近高位收市，收報20368點，係六星期最大單日升幅；國企指數收報8536點，上漲229點，成交620億元，雖然成交回升咗，但實數唔算多，如果成交跟唔上，個市彈力就應該有限。
藍籌股近乎全線上揚。市場憧憬下月聯儲局加息，匯控(005) 表現靚仔，揚3.8%造50.35元。市場指大笨象宣佈在海外發行可換股產品集資，變相增強資本，咁樣對維持資本有一定作用，成為推高股價另一理由。我就話夾大象容易夾高指數。
喺藍籌普遍回升下，要留意港交所(388) 昨日只升咗1.3%，收報178.7元，一反過往市升佢升得仲多的表現。港交所呢鋪失威，好可能正係同阿爺叫停匯改有關。去年初，阿爺推動金融改革，市場憧憬人民幣走出去，估計好多資金會湧出香港，當時港股成交試過衝上2000億元，港交所成為追捧政策下的寵兒，家阿爺唔行住，甚至掉番轉頭，即係話388好可能得寵變失寵。由於資金倒流，搞到連匹克都話要返內地上市，股價昨日復牌仲升咗14%，加埋人仔無得炒，等如對即將推出嘅人仔指數產品淋定冷水，咁對港交所點都有心理打擊啦。
霸王配股 接貨炒起
港交所行政總裁李小加呢個星期回應中央財金政策時力撐，話目前內地有大量資產，政府、交易所及監管機構有責任協助國內資金投資，故國際化不能欠缺中國部份，但同時港交所不是只會專注於內地市場，認為海外企業需要內地投資者。
現實上，港交所截至今年3月底止首季度業績，同比跌幅9.1%，每股基本盈利1.19港元，期內營業額下跌2.8%，由於去年第二季生意爆升，基數咁高，今年一比肯定大幅倒退，阿爺出咗門口行番轉頭，港交所就預咗要捱一段時間嘞。
個市夾倉，三、四線就搵概念炒，誹謗案獲判勝訴但只賠300萬的霸王(1338) ，宣判當日回落，但昨日就狂升35.48%收0.63元。佢之前曾批股集資，用0.31元接貨者家賺咗唔止一倍，可見接貨者唔係善男信女，出手都幾狠，回一回收埋貨，就大力掃上去，大家跟炒，但就要睇住幾時落車囉。霸王升跌同上唔上訴無關，同炒作有關。
陸羽仁
金融High Tea 舊文
來源 source: http://hdfin.stheadline.com
