英銀行股災
2016/06/28 09:05:35
網誌分類: 經濟
英國爆出一場銀行股股災。我在昨日的文章提到英國脫歐的後遺症，其中一項係觸發國際評級機構下調英國的評級。話口未完，惠譽及標準普爾公司昨日就做嘢。標準普爾將英國評級由AAA下調至AA評級。惠譽將英國原來的AA+
評級下調至AA，另外，把英國今年的GDP增長由此前的1.9%下調至1.6%，2017及2018經濟增長更由2%大幅下調至0.9%， 顯示英國因為脫歐，經濟衰退明年初才會逐步顯現。
標準普爾指英國對外財政狀況將會惡化，由於是次公投之中，有相當部份的留歐票係來自蘇格蘭及愛爾蘭北部，如果蘇格蘭提出獨立要求，將引發英國憲制危機，亦會影響英鎊作為儲備貨幣。惠譽則認為，英國脫歐將增大英國負債對GDP的比率，對外負債表擴大又提高銀行體系的潛在風險。
標準普爾及惠譽表示，隨著事態的進展，不排除進一步降低英國的評級。評級遭到下調，將大大影響英國未來舉債的能力，借貸成本上升。英鎊匯價因評級下調而下瀉，美元兌英鎊昨日由早上的1.35美元下滑至收市時的1.31美元，跌至超過30年低位，美元兌歐元升至1.10美元。
股市則繼續急挫，英國富時100指數跌2.6%，歐洲股市仲衰，再插超過4%，其中德國繼續成為輸家，再跌3%，連續兩日大跌近一成！
英國銀行股爆小股災，市傳穆迪將在明天把英國的銀行評級展望降低，由穩定降到負面，令英國銀行股急插，在英國上市的蘇格蘭皇家銀行及巴克萊銀行跌幅最驚人，觸發熔斷機制一度停牌。蘇格蘭皇家銀行周一最多跌26.2%，收市跌15.1%。巴克萊最多跌21.3%，收市跌17.4%。另外德意志銀行昨日曾跌9.7%至歷史新低，收市跌6.1%。匯控美國ADR收市折算港元為45.728元，比上日跌4.2%，比香港收市價46.65元，再跌2%。
另一方面，資金繼續湧入國債、黃金等避險資產，美國10年期國債跌至1.4445厘，黃金每安士升上1327.6美元。
英鎊及歐元大跌，推動美元匯價向上，反映美元兌6隻主要貨幣匯價的美元指數升上96.7水平，與美元匯價敏感的商品及相關股票首當其衝，杜瓊斯能源指數插超過2.5%。
杜指插261點，收17140點，跌幅1.5%點，標普500指數一度失守2000點重要關口，收市險守2000點，跌37點，跌幅1.8%。至昨日，杜指及標普500指數盤間都跌穿200天平均線，係3月中以來首次。反映此前的向上的上升軌，已經因為英國脫歐這隻黑天鵝打破，形勢有點危急。
大市呢兩日跌得急勁，係唔係入美股時候呢？有紐約分析師警告，目前美股的股價其實只係返番去大約一個月之前的水平，標普500指數截至上周五的市盈率仍19倍高位，認真唔平，無幾多股份可以買得落手。標普500指數2月11日時低位為1829點；杜指15647點，當時的紐約油價係每桶26美元，當時有好多能源公司擔心無錢還債俾銀行，令到銀行蒙受巨大損失。依家油價升上46美元上方，油公司沽出投資的股票，已經將資產負債表執番靚仔。
分析員指出，美股呢兩日的沽售與美國的信貸狀況沒有太大關係，美國不存在系統風險，亦唔出有銀行出現問題，跌市暫時只屬正常的調整。但標普500指數成份股當中有20%係科技股，係與歐洲危機關係最密切的，也是風際最高的，而其次係佔了15%的金融股，亦與歐洲好有關係，當中佔有14%的醫藥股亦與受到歐洲經濟影響。剩下來與歐洲沒太大關係的係零售股，但由於受到亞馬遜等網上銷售的衝擊，亦唔買得落手。
估計油價會徘徊在45美元至50美元之間，但由於美元升值壓力正在增加，油價可能受壓，油股亦無運行。七除八扣之後，可以買得落手的只有唔受網上銷售影響的零售商如Dollar Tree、Dollar General等一蚊店和TJX、Ross Stores等平價服飾店。另外，由於全世界投資者因為英國脫歐，嚇到腳仔軟，利息又咁低，亦可以考慮公用股及黃金股。
總的來說，美股還在一個避險情緒中，而歐洲股等緊第一波大跌後的反彈，預計有唔少資金想走但走唔切，一彈又有人走，所以亦唔好對歐股反彈期望太高，暫期仍是尋底格局居多。
陸羽仁
回應(4) 我想回應
陸羽仁 BLOG 舊文
來源 source: http://blogcity.me
