中環在線：
打貪兼經濟差 龐建貽轉賣平酒
■龐建貽話𠵱家買酒嘅客人越來越精明。 資料圖片 
飲食集團Classified Group（8232）老闆之一龐建貽有多個身份，佢係新世界發展（017）主席鄭家純女婿、「鋼鐵大王」龐鼎元
個孫，但佢應該最鍾意人記起佢係葡萄酒進口商大亞洋酒創辦人，事關「創業家」總好聽過「富三代」！
龐建貽大學畢業後跑去法國酒莊工作，對葡萄酒有熱情，15年前開展進口業務。早幾年內地豪客需求大，並推高曬葡萄酒價，龐建貽應該生意無憂，但隨住內地打貪，豪客唔見曬，加上經濟轉差，葡萄酒市場已不復當年勇。
多謝唐唐推介
龐建貽亦冇死撐，承認整個市場有調整，買酒嘅人越來越精明，「以前買家追貴、追出名嘅酒，呢類人𠵱家少咗，覺得價錢太高，或者覺得唔值，寧願揀平啲嘅品牌」，而佢見到市場對於入門級葡萄酒嘅需求大，亦賣多咗屬於Grade B或C嘅酒，轉攻薄利多銷。
講到呢類用作日常飲用嘅葡萄酒，佢即刻話要多謝「紅酒專家」唐英年。佢公司約6年前開始賣勃艮第嘅Faiveley，呢個品牌嘅酒介乎100至1萬蚊，唐唐發現佢公司有呢隻酒之後，有次出席公開場合推介賣100、200蚊嘅Mercurey，隨即令到產品需求大增。係嘅，唐唐又的確講過，「好多平酒係好好飲」。不如佢搵唐唐主持幾次試酒會，最好推介多啲平靚正嘅葡萄酒喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
