小心強美元
2016/07/25 09:14:00
網誌分類: 經濟
美股上周五小幅向上，杜指升54點，收報18750點，再創新高。美企盈利表現理想，上周五包括微軟、Honeywel、通用電氣、美國航空等多家巨企公布業績，業績都好過預期。
值得留意的是GE(通用電器)，比較去年同期，季度盈
利每股增長5美仙，而營收增長15%，由於市場一向視GE為美國整體經濟好壞的寒暑表，GE生意好轉，提振市場對美國經濟好信心，對股市有正面影響，睇股票恐懼指標VIX指數跌近5%至12的邊緣，超過一年的低位，可見一斑。
GE表示第二季的盈利主要來自航空、醫藥及能源部門都有好表現，不過佢又稱目前的經濟環境正受到「波動及放慢的經濟」所影響。股票是炒前景的，可能係市場聽到GE高層咁講，GE雖然業績超預期，但股價不升反跌，全日下跌了1.6%，係表現最差的杜指成份股，拖住大市後腿。
美企業績公布期開始進入直路，路透湯臣的資料顯示，至目前為止，已公布業績的標普500企業，當中有65%的業績表現，超出市場預期。First Standard Financial的首席市場經濟師Peter Cardillo認為，美企公布的業績比市場預期更好，不過，對推動近期大市的幫助，其實唔係市場所想的這樣大，受助於「無得揀」（no-alternative）呢個因素會更大一些。
Cardillo解釋，在環球息口處於歷史低位的時候，尤其係英國公投脫歐之後，市場擔心歐洲經濟不穩，甚至可能衰退，加上對於全球央行將會放水救市的預期大增，資金就湧入美國，美股就水漲船高。
美股雖然近期續創新高，已有點高處不勝寒之感，但從技術上睇，短線仍是炒上。美股剛剛突破了此前的窄幅橫行走勢，近期公布經濟數據的確唔錯，無論係勞工市場以及房地產市場都有不俗表現，如果比較環球市場經濟，更係一枝獨秀。另外，美企公布的季度業績不俗，特別係百業之母的銀行業，表現都有驚喜。投資者雖然擔心忡忡，但在手震震中繼續炒上。
中線而言，我覺得又唔可以對美股以至港股太過樂觀，因為美股升勢難以持續，正如老美分析員提到，美股強勢，好大程度上並非來自本身強勢，只係資金在無得揀的情況所致，炒恐懼和短線資金流。
對港股而言，另一個中線不利因素是美元走強。反映美元兌6大貨幣走勢的美元指數升上97.48，在5月還創出91.92的一年低位，短短兩個月回升6%。我有少少擔心，到美國加息苖頭再現時，美元指數又會衝上100大關，在過去兩年，美元指數在去年4月和12月兩度衝上100，隨之而來是商品跌、新興市場股市跌的亂局，因為資金從新興市場和商品流入美元資產。
如今美元升勢第一波是對英鎊、歐元和日元睇淡。觸發第二波升勢可能是英國脫歐議題重上日程，亦可能是美國加息預期重臨。我認為隨著環球金融市場穩定下來，美國加息預期重燃的機會不低，正路比較可能在8月底9月初出現，主要變數是聯儲局會否就住美國總統11月選舉而忍住，應加息不加。
美元急升的走勢令人有點不安，成為後市的隱憂。美元是真升還是假升，美息會加還是不加，成為後市最大變數。
陸羽仁
回應(8) 我想回應
陸羽仁 BLOG 舊文
來源 source: http://blogcity.me
