中環在線：
郭基煇組唔離地車隊破風
新鴻基地產太子爺兼執行董事郭基煇（圖），係出名嘅單車發橈友，平時講生意一本正經，但噚日一講起單車，即刻眉飛色舞，話嚟緊周末會到北海道比賽，之後9月返嚟，當然會捧自己集團場，參加新地冠名贊助嘅香港單車節。仲嫌舊年踩35公里唔夠皮，今年一於加碼，參加50
公里賽，踩番夠本。郭公子話今年比賽反應好熱烈，唔夠15分鐘個人賽就爆曬。
郭基煇又搵埋班啱key單車友，準備挑戰隊制計時賽。話說平日郭基煇同埋成班單車友，一個禮拜踩兩三次，由青山公路、東湧到香港島環島都試過。「同班隊友一日食兩餐，踩十零公里休息嚇、吹嚇水都好爽。」
隊友啱key 冇富二三代
含住金鎖匙出世，郭基煇唔多唔少都有啲離地，之不過踩單車令佢識到班唔同階層、背景嘅人，「好多踩單車嘅朋友，大家真係唔好分做乜、乜背景。」踩緊嗰陣互相「提水」，又遞水畀人，郭基煇話嗰種團隊精神令佢好開心，仲講到明隊制賽班隊友，除咗自己之外，冇一個係富二、三代咁話，總之就唔係離地單車團。
佢仲自爆操車嗰陣唔帶保鑣，老實講就算保鑣出動，都唔一定跟得上，事關郭基煇自言閒閒哋踩到時速40公里，貼近運動員水平。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
