女神tea time：
炒比卡超股？先捉網龍吧！
■今次Pokémon GO嘅成功，完全幫曬網龍示範AR技術係如何應用。 資料圖片
作為炒友，你唔知Pokémon GO點玩唔緊要，甚至乎你連比卡超係咩都唔知，都冇問題！不過，有三樣嘢你一定要知，第一，隻game令任天堂
股價六個交易日內，勁升75%；第二，隻game係採用AR技術；第三，隻game受歡迎程度係癲嘅。
講咁多，自然係想派福利！冇錯，是日隆重推介網龍（777），原因四個字講曬：AR網遊！網龍本來就你一隻game股，網遊加手遊產品；同時亦大力開發教育平台業務。
話說集團一早已就VR同AR作出部署，去年底已開始研發VR教育產品，今年下半年就會街。不過，公司一早已睇清形勢，副董事長梁念堅上個月接受訪問時講過，「VR是現在，AR才是未來」嘩！睇完真係覺得佢哋係先知。
近幾個月，更投資兩間AR公司，分別係來自加拿大嘅ARHT，同埋本地薑Cherrypicks Alpha。網龍通過整合兩公司嘅AR技術，將用作製作內容及軟件應用到遊戲、教學、娛樂及企業等範疇。
今次Pokémon GO嘅成功，完完全全幫曬網龍示範，AR技術係如何應用。他日網龍要開發AR game，無論吸用戶定係吸廣告客，一定更加容易，亦幫網龍諗埋一個廣告摸式。去一個唔覺意寫咗個大受歡迎App，廣告唔使搵都自動埋身，搵錢途無可限量！
另外，網龍走在潮流尖端，率先開發結合AR元素嘅教育平台。截至去年底，網龍贏得覆蓋內地14個省或直轄市內400所學校，5,000間教室的招標，當你見到Pokémon GO強國已有老翻，就知今次Pokémon GO亦正正變相幫網龍做埋廣告，話俾廣大潛在客戶聽，「我嘅AR軟件真係好玩又好用！」
公司冇錯去年業績轉盈為虧，蝕1.43億元人民幣，今年首季虧損，更由上年同期的1,091萬元人民幣，擴至1.14億元人民幣。不過，網龍的遊戲業務首季收益2.84億元人民幣，增長26.6%。網龍管理層表示，今年是公司對VR及AR的投入期，相信2017年會有收成。網龍喺周二受任天堂刺激，炒高一支大陽燭升逾6%；當任天堂都可以6日升75%，網龍冇可能已經炒完囉。
Fifi
http://fb.com/lovefrystock
本欄逢周五刊出
Fifi
女神tea time - Fifi 舊文
來源 source: http://hk.apple.nextmedia.com
