內房股仔爆炒易
2016年08月10日
港股前日急升300幾點後，投資者有少少畏高，大市昨日偏軟，但亦跌得唔多，藍籌雖然無乜焦點，三四線股反而趁機搶鏡，對小股民嚟講，氣氛可能仲好過升市。恒指昨日低開30點，基本上全日係幾十點間浮沉，恒指收報22465點，跌29點；國企指數收報9301
點，升24點，成交金額532億元，開始見到中資概念股表現改善。
恒大沾手萬科戲碼巨
7、8月呢輪反彈，中資股基本上落後，除左內銀外，內房回升力度都唔夠，主要係阿爺早前話要繼續擠走資產泡沫，各地樓市監控有加強跡象，影響左內房股氣氛。不過，中國樓市今年銷售其實唔錯，內房商賣樓普遍有改善，巨型內房賣樓一向穩定啲，影響無咁明顯，中型同做非一線城市嘅內房就唔同，今年賣樓容易左，對佢地業績改善仲顯著，所以最近嘅賣樓成績，就帶動左二三線內房股嘅股價，沿海家園(1124) 出售天津項目70%股權，料出售收益約20.77億元，刺激股價大升32%至0.25元；華僑城(3366) 盈喜，股價急升10%，收報2.88元；深圳控股(604) 升逾8%，收報3.59元；越秀地產(123) 升7%至1.11元；金茂(817) 、合景泰富(1813) 都升近5%；龍頭就以華潤置地(1109) 升3.4%最靚仔。
現時內房股資產折讓好大，以沿海家園為例，佢淨值有0.99元，未爆升前股價折讓80%，一聲套現股價就爆炒。二三線內房炒折讓同業績，一炒就爆上，但論到戲碼，始終係龍頭萬科(2202) 嘅爭奪戰巨型，尤其傳出恒大集團(3333) 入股後，恒大曾與寶能系接觸，有分析稱，恒大可能購入寶能所持萬科股份。
7月底至今，恒大通過7家公司，合共以近100億元人民幣增持萬科A股逾5億股，令持股量達5%。恒大指持股是用作投資。《證券日報》就報道，截至去年底止，恒大有逾1500億元人民幣未動用授信額度，雖然有分析稱，這些銀行信貸不能用來投資股票，但可支持恒大主營業務，為併購提供空間，連同手持現金，恒大可動用的資金規模逾3100億元人民幣，引發恒大增持以至控制寶能的揣測。
港鐵股價跑贏業績
恒大現時一年賣樓已經超過2000億元人民幣，今年目標係3000億，若然同萬科連同一線，肯定遠遠拋離其他陣營，對內房商佈局會有好有影響，所以恒大下一步點走，隨時對成個行業產生震盪。
股市潮流係一波波，內房早排受忽略，反而香港公司受捧，好似港鐵(066) 就迭創新高，當時陸羽仁已預告留意佢買樓收入減少，同埋客運會受旅業影響放緩。昨日公司就宣佈受物業發展利潤大跌影響，上半年度純利跌37.4%至51.2億元；每股盈利87仙。扣除物業重估的核心盈利跌25.7%至50.7億元。業績倒退主要因物業發展利潤大跌91%至2.07億元。另一方面，雖然佢年年加價，客運業務利潤增長僅8%。仲要留意管理層透露，沙中線造價將要顯著上調，較早前公佈超支41億元為高，因為會展站工地遲交，以及早前未預計會展站上蓋所需地基工程開支所致。
呢個業績，若然睇大圍環境，其實好似公司政總裁梁國權話，營運表現仍算良好，只係股價似乎跑贏左業績好多，咁就變成未必追得上預期。
陸羽仁
金融High Tea 舊文
來源 source: http://hdfin.stheadline.com
