炒深港通要手快
2016年08月16日
投資者續借「深港通」消息炒作，市傳最快可本周公佈詳情，並會在12月正式開通，內地滬深兩市半日飆逾2%，帶動港股再創今年高位，恒指連升四日，國指更出現八連升。
港股唔信唔信佢又升，繼炒低息效應後，O依家又炒深港通。如果淨係靠低息概念，合資格的
公用股、房託股數量有限，而且息口減到咁上下就減無可減，都幾難再谷上。近排已開始炒深港通啦，拉動咗同中資有關的概念股，牽引的板塊比較多，個市嘅動力多咗一瓣，先至可以連升咁多日。
個股唔易買中
個股因為不同概念拉升，指數雖然升咗，但受惠個股唔同先前主要係炒利息敏感股，O依家係有內地色彩的股份。
呢次輪到早前升得多的息口敏感股不升反跌，領展(823) 跌0.3%、中電(002) 跌0.4%，電訊盈科(008) 仲跌1.5%。板塊輪流炒的味道好濃。
暫時炒緊深港通，但呢個概念唔知幾時玩完，亦有可能本周一宣佈就見光死，到阿爺宣佈實行細節之日，就是大戶沽貨之時。同舊年滬港通最大嘅唔同，係舊年滬港通撞正阿爺想推高股市，火乘風勢，升得特別勁。深港通威力照計無滬港通咁強，若要在有限的炒作時間食胡，揀唔揀得中強勢板塊的影響都好大。
深港通最直接拉動的股份係中港兩地差價股，不過呢類股份炒差價係最缺乏想像力的股份。另一類係炒同金融相關嘅股份，最先起動係證券股，呢兩日見內銀股都郁郁哋，例如四大國有銀行中，中國銀行(3988) 收3.48元，升2.4%，升得最多，亦都好易理解，中行除了較落後之外，深港通唔少證券交易都會益到中行，做多啲生意。另外中資證券股亦落鑊，中信證券(6030) 升3.9%，海通證券(6837) 升4.9%，收市報14.46元。內險股亦炒起，升得最多係細隻少少的新華保險(1336) 升7.2%，收市報32.65元。
有中環茶友就提出個笨少少嘅方法，話可以買下指數掛鈎基金短炒。茶友話，脫歐後佢搏個市反彈，但唔知影響係點，揀個股有啲驚食唔正，於是扑槌買隻盈富基金(2800) ，後來個市反彈，雖然盈富升幅慢過房託同地產股，但總之個市升佢都升吓，O依家個市升咗3000點，佢都上咗15%，相當和味，咁如果信中資股可以炒吓追落後，咁係咪可從諗吓國指關連嘅ETF好似2828呢？
南早基金股東執身彩
前身為南華早報的南潮控股(583) 落實賣股，大股東嘉里集團將向長城資產旗下的長城環亞國際投資，出售所持有的74.19%股權，每股作價1.3459元。另外又會出售名下地皮畀嘉里，所得會派番每股0.59元，連同之前出售媒體業務所得，小股東可收回近3.5元。佢2013年停牌前好多時在1.6元上落，今日修成正果。
南早曾考慮過私有化，最後有基金覺作價唔理想反對，結果搞到流通量不足長期停牌，呢次賣盤基金可以獲利離場，賺多過先前接受私有化的小股東，但過程都算有血有汗。如果唔係郭氏在媒體難做之下仍搵到阿里巴巴接貨，仲畀到20.6億呢個唔差的價錢買走份南華早報，基金真係唔知坐到幾時，如果撞着大牛市，啲錢俾人責死，咁就好閉翳。南早停牌期間撞着股市有上落，無大升，死坐反而可能仲着數。
有時投資講運氣，但南早有資產打底，係翻身的關鍵，O依家連殼都賣埋離場，就最值得好多上咗市又用唔到股市集資的大股東學習嘞，用唔到個上市地位，何不沽之？
陸羽仁
金融High Tea 舊文
來源 source: http://hdfin.stheadline.com
