【不問價追】傑青貶值快過英鎊（小炒王梁心欣）（第94期）
2016-10-16 16:00:25
10月份的股市一如預期，是「古惑的市」以及難關重重，實應小注為妙。炒股唔炒市繼續大派用場，早前「路邊社」的消息竟然如此準繩，話10月頭無北水的日子，外國勢力會先行炒上一浸，
然後派返俾內地同胞，呢一招低買高賣果然在周二，10月11日應驗了，全日波幅600幾點，收市跌300幾點，收在23500點水平，估唔到咁嘅陰謀都俾人睇出！
自己唔敢大注博都無謂講太多市況。不如傾嚇近日最流行的「傑青」，出爐女傑青黃仰芳，芳齡40，以最後一年的參選資格（傑青以40歲為限）博盡，結果順利選中。是屆傑青四男伴一女，固然令人將焦點放落女士身上，但一番前言不對後語的成功論，就令人聽到都「毛管戙」。
以27歲之齡買入將軍澳中心，29歲供完，歷時兩年零八個月。聽落其實係無敵，30歲之前完成香港人心目中的人生目標，之後再坐擁過千萬物業。其實以上資料我都係睇報紙睇返嚟，有媒體連佢夫家姓甚名誰都搵埋出來，確實好快手。發生咩事不詳述，因為網絡世界太強，大意係，在香港人心目中，傑青係要為香港有巨大貢獻先稱得上為「傑青」，其過人之處是能人所不能，今次以有樓掛帥來選出傑青，直情將傑青之名大幅貶值，現屆及歷屆的得獎者，相信心裏皆不是味兒。
呢個現象其實幾可悲，用股票界睇，一隻股王，因為一些事情跌落谷底，到最後人人唾棄，股王不再。正如比亞迪（01211.HK），當年股神入股，由幾蚊一衝就衝上＄80，可惜之後業績交唔到功課，一洗就洗到落十幾蚊，現時返上$50水平，已經今時唔同往日，無人再叫佢神奇股，業績力有不逮，招至自身貶值，拱手相讓黃金位置。
題為貶得快過英鎊就要講埋畀大家聽，英鎊貶值已經進入第二波，心水清的一定要睇電能（00006.HK）以及長和（00001.HK），走勢明顯轉弱，尤其是6號，高位回吐已經10%，小心駛得萬年船，留意風口喺邊，識得避先至係贏家。
最後提提大家，第時發達被人訪問發達心得，記住講係炒股或做實業得來（當然千祈唔好跟某屆港姐冠軍一樣講自己買賣，永遠買到底及沽到頂，好易被拆穿），因為講買樓致富會招至社會問題，仲有好容易就起到底，大家千祈千祈要考慮清楚。在此，祝大家快啲成功爭取財務自由！
不問價追 - 小炒王梁心欣 舊文
來源 source: http://www.winmoney.hk
