中環在線：
葉劉姪仔公司上市 身家32億
■葉天賜嘅嶽父何壽南、老婆何淑懿同媽媽陳潔麗齊賀公司上市。
噚日有間專做企業融資與物業投資嘅浩德控股（8149）喺創業板上市，呢隻創仔本來平平無奇，特別在老闆葉天賜（Arnold）係立法會議員葉劉淑儀姪仔。53歲嘅Arnold外表鬼鬼哋，
幾靚仔，查實佢父母都係華人，講地道廣東話㗎。
Arnold係香港老牌建築商正興建築創辦人葉正平長孫，父親係葉家長子葉文山，母親係前兩廣鹽運使陳維周孫女陳潔麗。
如此家庭背景，Arnold讀書當然唔失禮，中學讀聖保羅男女中學，書友仔有廖創興銀行家族廖煒城、利希慎家族利子厚等等。劍橋畢業之後，佢1989年回流香港加入渣打（亞洲）專湊公司上市。
經常介入爭產風波
佢另一項興趣可能係處理大家族遺產，事關佢有份介入「李眾勝堂」保濟丸家族大細媽爭產風波，佢本身亦曾申請家族公司正興清盤、爭奪飛鵝山大宅業權，但全部無功而還。
佢太太都係名人之後，2004年娶咗馬主何壽南三女何淑懿，嶽父大人同葉媽媽噚日都有到，葉劉就冇影了。
Arnold話，平日要香港、日本兩頭飛，事關浩德除咗香港做企業融資生意，仲投資日本地產。浩德上市後股價爆升，市值43億元，葉天賜佔75%，即係有32億身家。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
