中環在線：湯文亮飛髮悟樓市見頂
都說有錢佬都是常人，好似專營收租業務嘅紀惠集團行政總裁湯文亮，佢剪頭髮都係幫襯灣仔一間普通髮型屋，洗剪吹200蚊左右。最近佢去理髮時，仲畀佢悟出一個樓
市道理，佢嘅禦用理髮師一直係淡友，忽然叫佢買樓，佢認為係樓市見頂先兆！
湯文亮話，佢搵開一名理髮師剪髮，一剪十幾年，對方家陣都40幾歲，「2004年左右叫佢買樓，佢真係買咗，不過2010年佢見高位沽咗，一直租樓等（樓市）跌，咁多年都係睇淡樓市想佢跌，又成日叫政府出招，講到好偏激」。
懶入市理髮師忽轉軚
去到今年初，湯文亮建議理髮師入市，對方仲話供應多，樓市就快跌，點知佢最近再去幫襯時，對方竟然轉曬軚，「佢話利息唔升，供應唔會多之類」，佢建議湯文亮入市㖭喎（湯文亮自己應該大把樓收租喇）。
湯文亮笑笑口冇乜點回應，只提醒理髮師「一係買新樓，如果買二手，就要買優質貨」。但佢心裏面開始覺得唔對路，道理好簡單，正如股市一樣，當冇買股票嘅牛頭角順嫂都畀股票冧巴嘅時候，通常係股市見頂時。
不過湯文亮認為，樓市仲未去到瘋狂程度，因目前入市嘅買家仲叫實力派，近期創新高嘅單位又屬於優質貨或頂層戶，樓市暫時唔似會爆煲咁話。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
