Money Walker：
人仔貶值牽連港人
■今次人民幣貶值主要係因為美元轉強。 資料圖片
人仔貶值又嚟料，不過市場今次未見恐慌，因為呢次主要係由美元轉強造成，而唔係大陸自己有問題導致。不過無論乜嘢原因促使人仔跳水，人民幣轉弱對港人生活影響都極大，即使閣下一毫子
人仔都無揸，亦唔係喺大陸公司打工，兼唔需要同內地公司打交道，都無法置身事外。
大陸有錢人同企業為咗唔想身家財產被人仔貶值蠶食，近幾年一直積極來港掃樓、掃股、掃商廈、仲掃埋地皮。如果人民幣貶值加速，意味住大陸人亦會加速來港掃貨，咁對於商人同埋揸住資產嘅港人一定係好事，事關手上資產會多咗批購買力支持，自由行亦有更大誘因來港爆買「港貨」。
筆者認為人仔持續快速貶值，將間接加劇本港貧富差距，但對於無產階級嚟講都唔係冇著數嘅，至少喺內地旅客重臨之下，零售業同服務業應該會減少裁員。另外淘寶亦會平咗，拎住歡樂卡北上作樂扮豪客都可以再豪啲，雖則今時今日未必個個都鍾意淘寶同北上。
其實人仔跌唔停嘅元凶係美元越升越強，所以之後仲貶唔貶極視乎外圍因素。筆者原先估喺油價繼續低位徘徊嘅情況下，美國通脹唔會高得去邊，出年全年加息都係一次起兩次止，但隨住油價再成宏觀經濟下嘅變數，影響滙市嘅因素已變得更為複雜，相信要等埋11月油組會議之後，包括人民幣在內嘅整體滙市先有明確方向。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com
