財經評論：內房中伏隨時爆煲
■內地樓市歌舞昇平的日子似乎要暫告一段落。 資料圖片
「上帝要你滅亡，必先令你瘋狂」，內地樓市由2014年開始經歷了兩年蜜月期後，有超過廿個城市調控政策出台，內房股歌舞昇平的日子暫告一段落。
由於內地買樓要等正式交樓後先可以入賬，故部份2015年及今年賣出的樓仍會
陸續在未來一至兩年陸續入賬，意味內房股的業績短期未必會太難睇。經常去睇樓的人都知，大陸樓盤最興搵人「做媒」，假扮買家搞㷫個場，令真正買家心急入市，難聽點講，真係幾多人「狗衝」直接碌卡入市，咩都買一餐，高位接貨係慘豬豬的。
別以為開發商一定賺到笑，其實佢哋都要唱番句「眼淚在心裏流」。好多公司今年加碼買地，一來誤判經濟差，以為中央會繼續盲撐樓市；二來過往兩年去庫存的確收效，硬住頭皮都要補充土儲，不然投資者又會擔心未來增長。仲有一類狂買地的，因以往誤信三、四城市發展，搞到要趁機會換地，轉去一、二線盲搶地。
樓市轉風向不是一日的事，在年初仲話要用多幾多百億攞地的公司，「地王」中伏名單投資者自然心裏有數，以後損手爛腳幾乎是必然事實。但呢樣係咪最慘？可能未係。阿爺這兩年為谷樓市，打造的盛宴令開發商瘋狂，大家發埋一大堆公司債，話就低息，但始終要rollover。
阿爺不鬆手就算，對申請新的內地公司債一直不批，拖得就拖，仲要勒緊你境外喉嚨，要搞備案「溫馨提示」，阿爺不批，房企哪敢發債？累計下來的債券、地產泡沫，中國會否「爆煲」？我不敢講，因為中國好像無「欠債還錢，天經地義」這種邏輯。
記者：方楚茵
財經評論 舊文
來源 source: http://hk.apple.nextmedia.com
