智取大市 - 晉佳 2016年11月21日
智取大市：基數近零的威力
■冠捷由唯一執董、老人家宣建生揸旗，自然轉型較慢。 資料圖片
特朗普效應似乎逐漸淡化，濠賭股、手機設備股爆上，較大可能係市場期待基金年結嘜數交功課，與此同時喺美金急升情況下，呢兩個sector亦成為資金避難所，相信踏入11月下旬，呢兩個sector會繼續硬淨。
承接上期講冠捷（903），產能、收入極高，盈利、市值極低，放血式削成本令季度業績虧轉盈，投資者投反對票，結果周五冠捷股價跌3%。不過，以下幾點值得留意。
第一，業績反映大削成本，冠捷係能夠賺錢，年度市盈率變番只得6倍。要令呢間公司重返大公司行列，當然十分難，但由於基數超低，所以改善空間極高。
第二，公司唯一執董係72歲嘅宣建生，一位老人家霸住咁大間公司嘅董事會，自然轉身、轉型慢。不過，既然宣建生年紀老邁，總有一日退下來搵人接管，既然董事會冇其他董事，冇接班人，睇嚟最終好大機會賣盤收場，公司有嘅係根基。
第三，冠捷6月底現金加存款唔夠5億美金，長短計息負債加埋5.6億美金，削減成本後，上半年經營現金流2.37億美金，睇嚟好快變淨現金公司。財政健全其實有好有唔好，因會令賣盤逼切性減低。呢隻係長期備忘股，情況同百盛（3368）差唔多，但論潛力冠捷高得多。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
