中環在線：
攞命陳狂出po做鍵盤戰士
■陳德霖
財爺曾俊華「to run, or not to run」，大家仲係估估嚇，但市場一直盛傳，如果鬍鬚曾做特首，金管局總裁陳德霖有機會擔任財爺，攞命陳上星期回應此傳聞時，笑而不語走咗去。但攞命陳應該幾想學財爺嗰套，希望透過多寫網誌《匯
思》，畀市民知道金管局做緊乜，提升貼地指數。
政府唔少官員，甚至特首都有facebook或blog，最多人like當然係財爺喇。金管局其實都有blog，叫做《匯思》，陳總2009年上場後牽頭寫嘅，有匯集一班高層思維嘅意思。
選舉年發力寫多一倍
過去多年，《匯思》文章寥寥可數，平均大約一個月一篇，2012年甚至只得7篇。今年卻一反常態，截至噚日為止，今年總共出咗35篇，相對舊年14篇，多咗一倍有多。
不過《匯思》唔同財爺網誌，財爺網誌好多時講財爺最新活動嘅所見所聞，順便畀大眾多了解佢，有時又乘機對時局點評兩句。《匯思》嘅文章內容則多數圍繞金管局政策，好似今年多人關心銀行開戶口問題，佢就寫多幾篇解釋金管局嘅睇法。表面睇，此網誌並非陳德霖嘅個人形象工程，不過又咁講，陳總喺特首選舉年之前，大寫網誌，話佢冇意更上一層樓，真係講都冇人信。
不過，陳總可能忽略一點，就係網誌相對被動，要人專登上網搵去睇，佢如果夠膽開fb page，被人喺網上鬧都唔怕嘅話，咁就做到真正貼地嘞。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
