堅叔無沽錯地產股
2016年11月09日
美國總統大選投票於本港時間周二傍晚正式開始，雖然最新民調顯示民主黨候選人希拉莉勝算較高，美股先行偷步炒上，但港股明顯跟唔足，相信主要係樓市辣招同人仔貶值呢啲因素，始終拖住港股後腿。
希拉莉紅利有限
誰將入主白宮即將揭曉，美股先派「希拉
莉紅利」，周一晚杜指爆升371點，升幅有2.1%。美國總統大選預計明日有初步結果，恒生銀行(011) 執行董事馮孝忠嘅睇法係，市場估計希拉莉勝出機會較大，故外圍股市已率先反彈，惟本港受樓市「加辣」影響，地產股下跌拖累港股表現。
馮孝忠認為，若希拉莉勝出大選，美國或在12月會加息。若特朗普一旦當選總統，市況可能和英國「脫歐」公投一樣，出現短暫逆轉。由於特朗普曾揚言如果當選，不會讓鴿派的聯儲局主席耶倫連任，市場擔心美國退出量寬，令股市波幅擴大，將導致下行風險增加。
O依家特朗普被睇淡，股市先升為敬，但希拉莉當選究竟有幾多紅利，值得個市升幾多，陸羽仁實在有啲懷疑。今次選舉被喻為「最醜陋的選舉」，選民投票係揀邊個無咁衰，喺成個選舉過程，聽唔到兩個候選人提出乜嘢大有為政綱。本來華爾街大戶話驚特朗普當選搞亂檔，若然佢當選個市就會大跌，選前話希拉莉贏面大，咁個市咪喺萬八點樓下炒吓反彈囉，但當希拉莉勝出，大家諗吓有乜好嘢，其實又係諗唔到，所以美元美股去得到邊處，真係值得懷疑。
美國選舉利好作用有限，對港股仲加打埋折扣，睇番過去兩日，港股升幅都跟唔足美股。周一開市美股杜指期貨扯高咗180點，但港股收市只係升咗150點，到第二日美股大升371點後，恒指昨日又係升得108點。同一個情況喺地產股都見到，周一發展商股份大跌，新地(016) 大跌近一成，昨日彈幅只係1.6%，報105.7元；長實地產(1113) 升1.33%，報53.5元；會德豐(020) 仲無升跌，收報44.1元。
會德豐呢吓插水落嚟，令我又諗起呢排我講過兩、三次，會德豐副主席梁志堅高位多番減持。當時我話堅叔係地產界老差骨，見過好多次起落，早排個市無論寫字樓、住宅都咁旺，人人都睇升，大行紛紛轉行睇番好時，但佢就喺高位逐步減持，反映佢見好即收。雖然咁樣唔代表地產股會馬上大跌，但起碼反映老差骨覺得呢啲價套現唔會蝕底。O依家掉番轉頭睇，住宅樓價係咁升，市民必然有意見，最後梗係逼到政府做嘢，所以一時嘅風光好難永續，見得樓市起起落落多，就知最後一文錢係最難賺，喺高位適當套現絕對無錯。
賣樓股跌10%係基本盤
睇番呢次政府出到咁辣，可見將來樓價無得再上，因為再上政府就會再加辣，辣到你腳軟為止。由於買家稅收成15%，以買樓收租只有2厘，加番畀稅使費實收1.5厘，畀印花稅等如10年租金收益，慢慢好難搵到人投資。發展商為求去貨，唔多唔少要啃咗佢，如果發展商同買家一人啃一半新增稅金，咁即係要負擔多3至5%稅，對發展商嚟講，如果一個項目賺30%，O依家就變咗少賺10至17%，以地產股跌一成係基本盤，如果樓價回調，新盤要賣平啲，咁地產發展股而家仲未跌得夠。佢哋前日跌得咁狠，昨日反彈咁弱，顯示唔係咁多人敢博反彈，醒目錢根本未郁手。
由於地產股無乜力，大市反彈主要係靠其他藍籌。市場憧憬濠賭股第三季業績將有驚喜，賭業股普遍造好，美高梅中國(2282) 漲2.8報14.16元；銀娛(027) 升1.5%報33元。至於大市曾升195點，高見22996點，惟成交未能配合，未能突破23000點關口，其後升幅收窄，一度僅升19點，低見22820點，午後市況反覆向好，尾市升幅稍為擴大。恒指收報22909點，上漲108點；國企指數收報9659點，升51點，成交金額只有538億元，市場觀望心態好濃也。
陸羽仁
金融High Tea 舊文
來源 source: http://hdfin.stheadline.com
