二線
蔡東豪寫了一篇「點解想做 iBanker」。
從蔡生的文章節錄以下三句。
「iBanker 數目罕有，搵錢特多，地位超然。」
廣告
「iBanker 的生活可以很吸引，出入五星級酒店和米芝蓮餐廳......」
「iBanker 是叻人，叻人高傲，這種高傲或者不形於色，收藏得很好
，但的而且確存在。」
廣告
恕晚輩不敢苟同以上三點，因為香港嘅 iBanker 唔係個個都如蔡生所述。
假若你的心儀對象是一位 iBanker，而你對他心儀的原因就正正因為他是一位 iBanker，請你停一停，諗一諗。
就好似買樓一樣，揀男朋友係一個重要決定。
就好似買樓一樣，私樓未必一定是豪宅，正如 iBanker 未必一定是筍盤。
就好似買樓一樣，一個 iBanker 屬唔屬於蔡生講嗰種 category，極度 depends on 三個字，三個你買樓之前都必定要睇嘅字。
呢三個字係：
Location，
location，
and location。
Yes，location 千萬個重要。
iBanker 未必一定出入中環，因為中環租金太貴，好多所謂投行都畀唔起。嚇？咁大鑊？投行都畀唔起？有幾出奇，投行都係一盤生意，而一盤生意最緊要係咩？最緊要係 clients 吖嘛，你估間間投行都有幸 serve 到長江和記？
既然佢哋嘅 clients 唔係長和系嗰種級數，咁收嘅 fees 自然都唔係長和系嗰種級數，而租嘅 office 就自然，bingo，唔係長和系嗰種級數。
中環有 iBank，中上環都有 iBank。
And if we go further on the map，我哋會發現金鐘都會有 iBank，就連灣仔北都會有 iBank。
結論是，區份反映輩份，所以地價影響身價。
但萬萬不要對號入座，我只係話區份係身價嘅參考，從來冇話過係能力嘅參考。
能力呢啲嘢，好主觀嘅。
再者，其實做二線區份嘅 iBank 好威。有乜咁威？你問問呢啲 iBank 嘅 clients 就知。
任何行業都好，正常嚟講，梗係畀錢嗰個，即係個客，係最惡。
不過如果你係一啲蚊型企業，又非常好高鶩遠地想學人上市，你搵嘅就會係呢啲二線區份投行。唔好以為你畀生意人哋做就大曬，呢啲投行態度就好似你女朋友咁，你不但要畀錢佢使，仲要受佢氣。
有啲乜嘢唔滿意，就話要 dd 你；喺招股書上面嘅一字一句，稍稍多咗兩粒形容詞，又話要 supporting；都係唔信你嘅話，sorry，唔該你做 stat dec。
試過有企業老闆對投行嘅態度忍無可忍，學人發圍。
地點係某家中型 printer 嘅其中一間房，長枱上面舖面曬各個 professional party 嘅晚餐，有鏞記燒鵝，Sushi Xuan 嘅 sashimi，不能盡錄。
企業老闆落咗去 printer 睇進度，投行代表話要 dd 呢樣 dd 個樣，唔可以如期入表。
老闆一路以來已經受夠氣，嗰日忍無可忍，旋即無間道韓琛上身，一個麒麟臂橫掃千軍，掃低曬枱上面嘅食物，跟住話：「刁你班杏加拎！而家叫你嚟寫書 (招股書) 定查案呀！」
一碟豉油輕輕濺了在其中一位投行職員的衣袖上，他望一望自己的衣袖，拿起掛在椅背上的西裝，不發一言，慢慢推門離開。
琛哥最後喺夏宮擺咗三圍和頭酒，嗰晚飲嘅酒全部都係 Barolo。
相反，如果你係一級投行，個個客都係超級大孖沙，你睇嚇你會唔會敢好似二線區投行咁惡？大孖沙畀嘅 fees 唔係一般公司畀嘅 fees，所以大孖沙要你挑戰證監就挑戰證監，要你強姦聯交你就強姦聯交，either you keep your dick head down and do the work or you kiss your ass goodbye to your fat year-end bonus。
有啲人會同你講，嚇，唔係喎，就算一級投行都唔使咁受氣喎。
受氣都要講級數。
以前有前輩同我講，一個億萬打工皇帝或者超級富豪對住你輕描淡寫一句 I don"t like it，你就已經會嚇到褲都濕埋。
現在的我有深切感受，所以我開會之前盡量唔飲水。
作者facebook專頁
來源 source: http://thestandnews.com
生活 - 葉朗程 舊文
