財經評論：懶人基金焗住你賭
■強積金推出咁耐俾人鬧足咁耐，打工仔辛苦賺埋賺埋，但就要強制去供款。 資料圖片
強積金推出咁耐俾人鬧足咁耐，打工仔辛苦賺埋賺埋，但就要強制去供款，仲要畀管理費，唔好話奢望第時供完舊錢夠退休，唔蝕其實已經幾好。俗語有雲：「有強姦無焗賭。」強迫供款都算，始終係想你老
來有錢傍身，但下年環球金融市場混亂，政府卻在此時推出懶人基金，其實等於要懶人投身環球股海，簡單講係焗住賭。
目前全港41個計劃的預設基金中，友邦、富衛同宏利共七個計劃，幫懶人揀了保證基金，即係就算唔賺，都從來無蝕過。至於剩低有一半係保守基金，即係唔貪心，只係投資落港元短期銀行存款同短期債券，投資風險極低；其餘一半先係投資股票及債券的混合基金。不過，下年情況開始唔同，懶人基金正式推出，積金局講明幫懶人投資時，會以富時及花旗環球指數作基準。
新出的懶人基金，將由兩個成份基金組成，隨著成員年歲調整股債比例。理論上，趁年輕投資股票，年紀越大則逐步減倉轉去債券，成套懶人基金理論係無問題，只可惜市況唔就。懶人基金股票投資部份參考「富時強積金環球指數」作基準，債券則參考「花旗強積金全球政府債券指數」。前者十大成分股全是美股，後者以投資歐洲及美國國債為主。
美國加息周期下，債息上升令債價下跌，環球債市繼續受壓，老懶人會係債價大跌時買入政府債。另外，美國加息令資金流入美股，美股正經歷上升周期，年輕懶人明年追入美股大有機會摸頂。
唔想焗賭？懶人下年收到通知書後，即刻係42日內表達投資意向。如果繼續無任何投資指示，下年賭枱見。
記者：陳洛嘉
財經評論 舊文
來源 source: http://hk.apple.nextmedia.com
