操盤手劄記：吼強美元概念股
■強美元時代，出口美國股份受惠，偉易達是其中之一。 資料圖片
仲有38日，中國就陷入悲觀經濟學家所講嘅狀況：工廠停工、商店閂門、政府停頓、交易所無法交易；有錢人爭相出國，老百姓搶購食物；戶戶喺門口張貼標語表達訴求，街上充滿爆炸物殘留嘅火藥味，人人無所
事事……呢種景象坊間稱為「過年」。
過年之前，先過聖誕新年，幾日後就係喇！不過，臨近聖誕，歐洲接連發生恐襲，但市場似乎唔太擔心，隔晚歐洲Stoxx600指數再創一年新高；美股道指、納指更再創歷史新高。道指高見19988，收19974，直逼二萬關。港股承接升勢，昨日反彈80點，收21809。恒指周一跌破11月9日低位21957後，已連續三日收於其下，確認跌破橫行區，利淡。
現時道指與恒指相差唔夠一成，睇道指走勢就快超越恒指，此情此景已闊別17年！道指與恒指估值差距則越來越遠，過去20年兩者市盈率平均14至15倍，但喺「特朗普升市」下，道指已達19倍，恒指則為12倍，反映美股貴，港股平。道指一旦突破二萬關，回調壓力大。
美國上周加息後，美股無乜大礙，港股就連日下跌，皆因港元與美元掛鈎，香港遲早要跟隨加息，否則在港收息嘅熱錢就會回流美元。美元走強，相對之下，人民幣走弱，投資者擔心中資股估值受到拖累，中資股佔恒指半壁江山，港股跌數難逃。
聯儲局上周預告，明年會再加息3次。強美元時代，美股強勢，出口美國嘅股份亦受惠，不妨留意偉易達（303）。偉易達主要從事設計及產銷電子產品，市場以北美洲為主，人民幣貶值可令其競爭力增加。上半年度，北美洲銷售佔總收入48%，歐美地區合共佔總收入超過九成。近期歐美經濟改善，加上股市造好，財富效應浮現，有利銷情。
集團近日已完成收購德國專業及商用網絡電話（VoIP）品牌Snom Technology AG全數股權，長遠可帶動盈利增長。偉易達現價101.2元，市盈率18倍，同業中偏低，但近日累升唔少，宜候低吸納。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com
