中環在線：陸叔等抱孫 唔敢外遊
■陳永陸
今年港股表現乏善足陳，不過資深股評人陳永陸（陸叔）就好醒神，皆因佢臨近年尾有喜事，好快又抱孫呀，今次仲係孖孫仔，所以佢聖誕節長假唔會出門外遊，要睇住一對孫仔出世咁話，認真要講句恭喜曬。
陸叔育有一子一女，3歲孫女12月出世，上星期先至慶祝
生日，佢新抱𠵱家陀緊一對孖仔，預產期係12月25至31日，陸叔形容新抱個肚真係籮咁大，難怪佢噚日講起呢件事，表現得既興奮又緊張，欲言又止，應該都係好心急，想孖孫快啲出世。由於要等孖孫出世，所以佢個女原本話聖誕節請佢同陸嬸飛去台灣旅行，佢都話唔好喇，費事心掛掛啦。
不過最令人羨慕嘅，可能係陸叔可以同兒孫住埋附近。好多人都知道，陸叔喺灣仔某個豪宅屋苑擁有多個單位，佢仔同新抱住喺隔籬單位，女就住樓下，成家人每晚都可以一齊食飯，佢同陸嬸每日湊孫亦極之方便，唔使走來走去。
問陸叔家族成員係咪有孖仔孖女，佢就話可能家陣大家飲食唔同以前，生孖B都未必係家族遺傳。咁又係喎，靚仔股評人鄧聲興（Kenny）舊年底生咗一對龍鳳胎，而佢家族都冇親戚係孖仔孖女。講講嚇，話唔埋陸叔一對孫仔將來會同Kenny一對龍鳳胎做同學仔㖭喎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
