中環在線：眾星今年閃爆港交所
話咁快嚟到2016年最後一個交易日，循例來個總結，要講財經界今年最爆事件，肯定係「翠如BB」父親大人黃永華有隻聯旺（8217）上市，上市當日翠如BB同男友蕭正楠閃爆交易大堂；而今年除咗佢哋，仲有型男王敏德、前港姐胡家惠、Angelababy現身上市儀
式，令到港交所（388）交易大堂真正係星光熠熠。
上市儀式一向悶到瞓，賓客要一早9點到場，等到9點半敲鑼，通常只得新上市公司嘅老闆同管理層自己最高興，唔少老闆娘仲會著到成隻雀咁去敲鑼，然後大家一字排開影張靚相就散band，但自從舊年底趙薇主持中國創意（8368）嘅上市儀式後，交易大堂今年嘅星味進一步增強。
翠如BB最保密
有趣嘅係，學林鄭最近講嗰句，呢班明星事前嘅保密工夫做得好，好似「翠如BB股」聯旺，上市前，根本冇乜人知道公司大股東係翠如BB阿爸，直到聯旺4月掛牌當日，大家見到翠如BB幾姐妹出現，先知係佢爸爸嘅公司。內地P圖神器美圖秀秀開發商美圖（1357）本月掛牌，Angelababy以「首席顏值官」（即係代言人）出席上市儀式，亦生色不少。
交易所每年有百隻新股上市，好多面目模糊，新股以後如果想大眾知道佢哋上咗市，不妨花錢請明星代言人去上市儀式，記唔起間公司，都記得粒星吖嘛。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
