異動空間：明年三個異動位
■如果聯儲局2017年要加到三次息，3月應會出手加第一次。 資料圖片
今年最後一篇，秉承本欄「異動為本」的方針，就講番2017年（上半年）三個魏力認為會出現市況大異動的事件，有好有壞，等各位mark低早作準備。
第一件好快到，就係1月，農曆新年前大陸例排水
緊，加上人幣喪貶、走資無所不用其極，如果1月外儲大減，人仔穿7算後free fall，個市確係有條件殺多一浸。不過，觀乎中資為走資不問價來港搶地，當險資1月有番額度可南下掃貨，會否泊落低殘的港股避難？1月會相當chok，但可趁跌市低吸，博執北水一轉過肥年。
第二件係3月中，聯儲局今年第二次議息，耶倫會後見記者，如果2017年要加到三次息，3月應會出手加第一次；如果無料到，加息預期會顯著降溫，美元急回有利新興市場（特別係港股）反彈，隨時係全年最好炒的一段。
第三件較少人講，係4月23日的法國大選，如極右政黨「國民陣線」舵手勒龐上台，歐盟大件事，隨時四分五裂，因法國用歐元，亦為歐盟第二大經濟體，較英國脫歐影響更深遠，買番啲金無壞。
至於下半年？咁遙遠的事到年中再睇吧，試問閣下目前炒股有幾何會揸半年？Happy Trading，2017再見！
魏力
http://www.fb.com/2012jason
本欄逢周一、五刊出
魏力
異動空間 - 魏力 舊文
來源 source: http://hk.apple.nextmedia.com
